عصام دويدار يكتب: على درب الخال.. جواب رقم" 3 "

جوابات الأسطى حراجي

العامل في السد العالي

الى زوجتنا

فاطمة أحمد عبد الغفار

الكاينه في جبلاية الفار

.........................................

إنتي يا فاطمة

بنت أصول

مش محتاجه

حراجي يقول

إوعي يخونك

تاني القول

إن حراجي

عنكم لحظه

كان مشغول

............

عندك حق

كان مفرض

أسأل ع الحال

وأعزيكم

إنتي وكل الناس

في الخال

...............

بس أمانه

إوعي يافاطمة

تكوني زعلانه

فرحتي إني

راجع من تاني

وخوفي إن الناس

تنساني

خلوني أكتبلك

عمياني

إفهمي يا عبيطه

موت الخال

مش حاجه بسيطه

يعني أنا وإنتي

وكل الكفر

أصبح بينا وبين

الدنيا مليون حيطه

شوقي ليكم

مش جوابات

ولا حتي في

كتر السلامات

إسألي قلبك

هو يدلك

إن حراجي

مشتاق ليكم

أكتر منك

قولي لعيد

أبوك بيقولك

شيل في عيونك

أختك وأمك

خليك راجل

البيت في غيابي

عايز الناس لما

يقابلوك يشاوروا

يقولوا دا ولد حراجي

وإن حراجي لسه

بيناتهم

لسه مشاركهم في

حياتهم

وقولي لبتك

أبوكي أكتر

م الدنيا بيحبك

بس بيقولك

سرك أمك

أوعي تخبي

شيئ عنيها

وإوعي شيطانك

عنها يضلك

بلغي كل الكفر

سلامي

وقوليلهم الخال

لو مات

ريحته في كل

حروف جواباتي

وإحنا مش حبة

كلمات

إحنا ولاد الخال

أبنودي

ولسه حياتنا فيها

حاجات

محتاجه نعبر عن

فكره

إنشاله في حبة

جوابات

أخر القول

أنا مش هسكت

لازم أقول

وديما هكتبلك

علي طول

ولما الرد بتاعك

يجي

راح أبعتلك

مهما يكون

يووووه

كتر سلامي

أهوووه نساني

ناسي ايه يواد

يا حراجي

قبل ما تخلص

الورقادي

أههههههههههه

الريس عَيَّنِي غفير

وانا بكتب في جوابي

الجاي

عندي ليكي حكاوي كتير

........

سلام مؤقت

زوجك الاسطى حراجي

.................

نلتقي في رد فاطمة جواب رقم 4