"أربع سنين" قصيدة لـ الشاعر عبد الفتاح فليفل

ننشر قصيدة "أربع سنين" للشاعر عبد الفتاح فليفل.

بغسل جروحى من الضباب

وغبار شوارعى

ما يصطفيش إلا الهباب

أربع سنين

بقلع همومى

على الرصيف

والبسها تانى

صوت الأغانى

ما بيصطفيش إلا الحيارى

عكس المسار

دندن شراعى على الرصيف

تاهت ملامحه من البكا

فاضطر للتوهان

درويش بيعشق مهنته

ويصبر الأحزان

وعيال بتمدح ف الرصيف طعم الأمان

عكس المسار

هرب النهار

غناله مره "الليل حزين"

اه من الكورنيش

و من هوى المواويل

فوق كوبرى قصر النيل

اه من الدرويش

كاسات بتشبه بعضها

صوت السكارى زى الحيارى

وبصيرتى عازفه عن الرؤى

أربع سنين

بدبح قصايدى

من القلق

واشتهى صوت الرصاص

يعمل تناص

فوق الشوارع

فاكتب قصيده

تشبه لجرحى

جرحى القديم

أربع سنين

بكتب حبال فوق الغسيل

يمكن فى مره تضمنى

واصطفى بنت الجيران

سطوح بيشبه ميدان

نظرتها

ضرب الرصاص

من برا أحلامى الشريدة

أربع سنين

برا القصيدة