بعد اعتزالها.. بطلة الأولمبياد سهام الصوالحى: انتظرونى مدربة لمنتخب التايكوندو

أعلنت اعتزالها رغم أنها ما زالت فى مرحلة الشباب، فبعد مشاركته فى أولمبياد البرازيل خضعت سهام الصوالحى لاعبة منتخب التايكوندو لعملية جراحية، ثم أعلنت اعتزالها.. "اليوم السابع" حاور اللاعبة للتعرف على تفاصيل أكثر عن أسباب الاعتزال وخطتها المستقبلية .

- ما أسباب اعتزالك التايكوندو؟

الإصابة الأخيرة التى تعرضت لها خلال بطولة الجائزة الكبرى، حيث أٌصبت بكسور فى اليد وتم تركيب مسمار.

- وهل هذا سبب كاف للاعتزال؟

أهلى قالولى كفاية إصابات، وكان نفسى أكمل عشان بطولة العالم اللى جاية، ولكن أهلى رفضوا بسبب إصاباتى.

- وماذا بعد الاعتزال؟

أنا توليت تدريب فريق بالإسكندرية محل إقامتى مرحلة 14 سنة، وسجلت معهم عقدا قبل مشاركتى فى الأولمبياد، لأنهم كانوا حريصين على التعاقد معى ولكن لم أنتظم معهم فى التدريبات سوى فى شهر يناير.

- ما رأى الاتحاد وزملائك فى اعتزالك اللعبة؟

رئيس الاتحاد كلمنى والمدربين وأصحابى فى المنتخب قالولى لسه بدرى بلاش اعتزال، خليكى معانا لكن فى النهاية ده قرارك.

- هل عرض عليك تدريب أى منتخب؟

هو المشكلة إن عشان أمسك منتخب لازم أمسك نادى فى البداية، عشان اكتسب خبرة وبعدين بقى أدرب منتخب.

- أيهما أفضل اللعب أم التدريب؟

أنا بالنسبة لى فرحتى كمدربة بلاعبى فريقى وحصدهم الميداليات أكتر من فرحتى بميداليتى كلاعبة، لأنى بشوف تعبى أمام عينى، وبالفعل شارك الفريق الذى أدربه فى بطولة جمهورية وحقق اللاعبون 4 ميداليات مقسمين إلى 2 ذهب و2 برونز.

- وماذا عن أولمبياد طوكيو؟

كنت بقول نفسى أشارك فيه، البداية أصلا وقت أولمبياد لندن كنت بقول نفسى أشارك فى البرازيل عشان أحقق ميدالية أولمبية وفعلا شاركت، ولكن لم أوفق، وخلال البرازيل قلت نفسى أشارك فى طوكيو عشان أحقق ميدالية لأنى حسيت إن ربنا مكرمنيش المرة دى، لكن كله خير الحمد لله أنا راضية.

- شايفة إنك عملتى اللى عليكى فى التايكوندو؟

حسيت إنى خلاص أصلى دخلت المنتخب صغيرة، وعملت اسم كبير وراضية عن نفسى.

- اعتزلتى من قبل ما الأسباب؟

المرة دى هى الثانية فى الاعتزال، ففى عام 2013 اعتزلت ووقفت لعب لظروف خاصة، وبعد 6 شهور رجعت تانى.

- هل هناك احتمالات للعودة من الاعتزال؟

مفيش حاجة بعيدة عن ربنا.

- ما الذى تنتظرينه من اللعبة؟

أنتظر أن يصل النادى الذى أدربه إلى مكانة عالية فى اللعبة، وأن ينافس بقوة وكمان قريب هتشوفونى مدربة فى المنتخب.