عصام دويدار يكتب : على درب الخال جواب رقم (6)

جوابات الأسطى حراجى

بعد الخال

.......................................

من فاطمة أحمد عبد الغفار

الكاينة فى جبلاية الفار

الى زوجنا الغالى

الاسطى حراجى القط

العامل فى السد العالى

........................................

أنا وعيالك عندينا عيد

نفسى تشوف عزيزة وعيد

الفرحه بتخرج منيهم

وطول الليل نازلين طنطيط

وأنا يا حراجى اتلخبط حالى

ولا عارفه إيه اللى جرالى

كان ودى أرقع زغروده

وولدك عيد كان بيقرالى

دموعى نزلت م الفرحة

هو أنا يعنى مش حقى أفرح

كَنى عروسة لابسة الطرحة

طب واللهِ يا حراجى صحيح

حاسه روحى مسابقه الريح

كَن جوابك كان تصريح

لقلبى يتنطط ويصيح

يا أبو القط الشوق غلاب

شىء ولا يوصفه ألف جواب

مهما أنا قولت فى الجوابات

وصف الشوق بقلم كداب

روحت على أم على أبو عباس

أقوليلها تسأله وخلاص

كيف الواحد يقدر يوصل

على أسوان

فجأة لقيتها بتبكى دموع

قولت أستفهم أيه الموضوع

قالت على سافر على مصر

ولاقيتنى ببكى وياها

مخرجتش غير بعد العصر

دورت الحسبة فى راسى

وقولت .............................

أسوان محتاجة ايه غير

قطر.................................

فاكر أول جواب منيك

لما دموعى بلت شباك القطر

إياك فاكر إنى نسيت

دا أنا حافظه الجوابات بالسطر

إبعت قول راح تستنه

فى أى محطه ...................

وأنا جاهزه .................

واقفين بس على قفل

الشنطه ..........................

وناويه أدبحلك كام فروج

على كام بطه ................

وراح أسويلك كام فطيراية

وراح أجيب زلعة مِش معايا

والاجرة خليها وياك

خيرك مالى علينا الدار

وفرها لمصاريفنا هناك

بيقولوا غالية كتير أسوان

.......................................

أبعت رد عليا قوام

أنا من فرحتى خايفة أنام

أصحى يقولوا دا كان أحلام

وكل كلامك جوه جوابك

زيادة شوق خلقت أوهام

............................................

زوجتك فاطمه

........................................