بالفيديو..سحور جماعى فى "أرض اللواء".. "أوبن بوفيه" لأهالى المنطقة تحت شعار "نتسحر ونتعرف على بعض"

ربنا ما يقطعها عادة"، كل عام فى شهر الخير شهر رمضان، يقوم أبناء شارع الجامع بجمع المال وتجهيز مائدة سحور لأبناء المنطقة والأصحاب والأقارب، واختلف هذا العام عن العام الماضى، بأن قام أبناء شارع الجامع بإحصار بعربة فول و"مقلاة" للبطاطس والطعمية، وقاموا بعمل عجينة الطعمية وتجهيز البطاطس وتحميرها.

يقول عبد الرحمن أحمد، أحد أبناء شارع الجامع بأرض اللواء "أحنا بنعمل السحور ده كل سنة، وبنجمع الناس كلها وبتيجى تقعد فى السحور، هتلاقى مثلا واحد صاحبك مشفتهوش من فترة، وهتلاقى ناس حبايبك بقالك كتير مش عارف تقابلهم، السحور ده احنا كلنا بنلم من بعضينا وبنعمله، عشان نشوف كل حبايبنا اللى بقالنا فترة مش عارفين نشوفهم وبيبقى فين ود بينا".

وأضاف عبد الرحمن، السحور هذا العام مختلف، " يوجد طعميه وبطاطس وجبنة وبيض وفول يعنى سحور كامل متكامل" وهذا السحور يطعم حوالى 200 فرد أو أكثر.

فيما قال مصطفى محمود، أحد أبناء شارع الجامع بأرض اللواء، "احنا عاملين السحور كلنا مع بعضينا لمينا فلوس من بعض وعملنا السحور ده ومش شرط منطقة أرض اللواء بس، فى ناس من بولاق وناس من امبابه وناس من العمرانية ودى كل سنة بنعملها وكل عام وانتم بخير".