مبروك علوه يكتب : قلبى شاريك

أول مرة شوفتك فيها

قلبى طار وهفهف حواليك

وأما عيونك جات فى عيونى

أشتقت فى ثوانى ليك

ياللي جمالك شغلى بالى

يامدوبنى بنظرات عينيك

نفسى أطير فى السما

وأخطف نجمة وأرفرف أجيك

وأكتب مواويل وأغنيلك

وما يحلى السهر غير بيك

وأشيلك جوا نن العين

وبجفونى يا حبيبى أغطيك

وأفرش لك فى القلب محبة

وعن عيون الناس أداريك

وأزرعلك بستان أزهار

وأقطف لك منه وأهديك

وأنحت فى الصخر الصوان

تمثالاً يتجسد فيك

وأضمك يا حبيبى فى صدرى

وفى ليل الشتا أدفيك

وأعملك من دمى أنهار

ومن حبى وحنانى أرويك

يابدر طالع فى العالى

والله أنا قلبي شاريك

دا الحياة وياك تحلالي

ولا هقبل غيرك شريك

ما هو أنت حبيبى الغالى

وأتمنى لو عمرى يكفيك

أنا قلبى صبح أسيرك

وهعيش لمين غير ليك

بتمنى أعيش دنيتى معاك

ومن غدر البشر أحميك

وتحلو أيامى وسنينى

ياللي عمرى إبتدا بيك