سمير حافظ النواجى يكتب: يا دنيا يا غرامى

يا دنيا يا غرامى ليه فيا بتوجعى؟!

بتلوى ليه دراعى وبصوتى تسمعى؟!

الهم أنا شيلته فيكى وكان أملى تسمعى

لقيتك بتكرهينى وكمان هترجعى

ليه المر يكون نصيبى وقفايا تولعى؟

والفرحة كنتى دايماً على غيرى توزعى

صعبت عليا نفسى وبكيت فى مخدعى

وقولت لنفسى فوقى فى هواها لا تركعى

يا دنيا عشت فيكى على طول بدفع تمن

وأقول يا حيط دارينى مجروح من الزمن

أنا ياما ناديت عليكى فى عرضك ركزى

الورد زرعته فيكى ليه بشوكك بتئذى؟!

...........................................................

 حاولت أعلى صوتى وأنينى أسمعك

كان أملى تحضنينى وأقول ما أروعك

وأنسى اللى شوفته منك منا لسه بعشقك

يا اللى حالك معايا بيحكى أغرب حكاية

حكاية بتحكى عنى إزاى قربك ظالمنى

أقرب تبعدينى ومن غير ما أعرف سبب

وأبعد بتدبحينى يا أعجب م العجب

وفى سنينى تكرهينى وبدأت ف الندم

وبتمنى الموت يجينى وارتاح من الألم

لو كان بُعدك دوايا فى حضنك هترمى

وأبيع اللى ورايا وحُبك هشترى

وأَسِد ودانى عنهم ولو قالوا مفترى

يا دنيا يا غرامى ليه فيا بتوجعى ؟!!

بتلوى ليه دراعى وبصوتى تسمعى؟!!