بالفيديو.. عمرو أديب: أفكر وأنا فى لندن بإجراء عملية تحويل من زملكاوى لأهلاوى

هنأ الإعلامى عمرو أديب النادى الأهلى بفوزه على نادى الزمالك، معلقاً على هزيمة نادى الزمالك بهدفين مقابل لاشىء: "إخوانى فى نادى الزمالك.. هارد لك.. البقية فى حياتكم.. كما عودتكم ينضم هذا الفيديو إلى المجموعة الذهبية بتاعتى، يمكن دا الفيديو الـ15 فى الهزيمة الـ 15 للزمالك من أول ما ابتديت أشتغل فى الإعلام، جمعوا فيديوهاتى فى ألبوم واحد وهتشوفوا إنى بقول نفس الكلام".

عمرو أديب: أفكر وأنا فى لندن بإجراء عملية تحويل... by youm7

وأضاف أديب خلال تقديمه برنامج "كل يوم"، على فضائية "ON E"، من لندن: "بفكر جدياً إن هنا فى لندن يكون فيه دكتور يقدر يعملى السويتش ده، فيه حاجة أكيد فى جسم البنى آدم تخليه يتحول من زمالكاوى لأهلاوى، وأقعد كده اتفرج على وليد سليمان وأجاى، وأقول لمحمود طاهر إيه الجمال ده، ومبروك للنادى الأهلى، وكل الحواديت دى، هنا يعملولى العملية البسيطة دى وخلاص".

وأشار أديب إلى أن الكابتن مدحت شلبى تحدث عن سوء لعب فريق الزمالك، معلقاً: "إحنا الموسم كله بنلعب وحش، دا نادى هرب منه اتنين حراس مرمى فى ماتش، احنا عندنا مشكلة كبيرة، مبروك للأهلى، كل مرة أغلط نفس الغلطة، أقعد أعيط على الزمالك وما أحييش الأهلى وجمال الأهلى وحسام البدرى".

وتابع أديب: "لاعبو الأهلى اللى قاعدين على الدكة برة يبوسوا تراب الملعب ويلعبوا، مش قاعدين مستنيين هتدفعلنا كام، أى واحد منهم لو انتقل لأى فريق هياخد فلوس أد كده، بره أو جوه، بس دول يبوسوا تراب مختار التتش ويلعبوا، وهى دى الروح اللى بيقولوا عليها دايما، روح الفانلة الحمرا".