"كامــيرا بلاســـتيك" قصيدة جديدة لـ ماهــر مهــران

(1)

كان عندى كاميرا بلاستيك

وكنت مصـــــوُّراتى فــنان. .

دلوقتى عندى رشَّاش بأستك

وضهرى لجهنم، ووشى للومان !!

(2)

ماتحرمنيش من كل حاجة

وسيبْ لى حاجة أتعلَّق بيها. .

دا الحياة من غير ولا حاجة

الموت أحسن منِّيها !!

(3)

ياللى أنت عايز تصيد سمك

وتستمتع بطعمه، وتتحيَّن. .

مفيش حد بيصيــــــد سمك

من غير مايتعب ويعرق ويتطيَّن !!!

(4)

ياوردة بتشرب مرار

وبتدِّى الخلق عطر وحياة. .

وبتصبر على الريح

وبتخبِّى فى قلبها الوجع والآه..

سامحينا يا وردة

وسامحى خلق هدَّها العجز واللامبالاة!!

(5)

سيبونى أنام تحت نخلة

سيبونى أفرح بزرع السنين. .

سيبونى أسقيكم عسل كأنى نحلة

سيبونى أحسّ ناحيتكو بحنين. .

سيبونى أعيش الحياة طفل حافي

وعيشوا أنتوا براحتكم عيشة المجانين !!

(6)

ماتخافش من النِّسر

دا عداوته علانية. .

وخاف من الوطواط

دا مخالبه مخفية !!

(7)

الورد اتشح بالسواد

والصبار سدّ عين الشمس. .

طب مش كفاية يا واد

دا القلوب شاخت

من كُتر هذا النَّحس !!

(8)

ما تولعوش النار دا النار مابتفرقِّش. .

وماتدخلوش فى اختبار مسموح فيه بالغش. .

دا النار اللى بتاكل الشوك

هى هى النار اللى بتاكل الْوِش!!

(9)

يانهر حافظ ملامحنا

يا أب حنون ع الكتف بيمرجحنا

يا حبيبة بتناغشنا وتفرَّحنا

ليه القلوب بقت صوَّان ؟

وليه بقى ع الدَّم بيجى ريحنا ؟!!

(10)

أنا هارسم وأنت امسح

أنا هاداوى وأنت اجرحْ

أنا هاحلم وهألف وهاشطح

وهاكشف الأكاذيب

اللى بتتمثَّل على المسرح !!

وأنت اضحكْ

(11)

صوتى ضايع ولَّا واصل؟

طب إحنا ع الهوا ولَّا فى فاصل؟

طب انحيازنا لضى الرُّوح

ولَّا لملى الحواصل ؟

طب إزاى الكائن المدبوح

هايخطِّى لقُدَّام

وهوَّ عاجز عن فهم اللى حاصل ؟!!