نصر فتحى اللوزى يكتب: غريب

من قبل ما أعرف الكتابة

حفر الزمن على قلبى

أنين الربابة

من قبل ما أعرف القراية

نقش الزمن على جسدى

حروف

مش رواية

ولا كان ناوى يحكيلى حكاية

ولا كان عايز يقوللى

أنت غريب وللأحزان مراية

ولما علمتنى الأيام

حروف

قريت نقش الزمن على جسدى

صفوف

جواها ألوان قزح

تاهت

ماعدا لون ظلام الليل

مكتوب عليه هى دى

الظروف

وخطوة بتسلم خطوة

زحمة

من غير ما أشوف

أو حتى أعرف كلمة

خوف

كنت خايف من قبل

ما أعرف الحروف

اللى حضنت بعضها

بقت وشم على عنيه

رسمت كسوف

وطال الليل مع الخسوف

قبل السطر الأخير

عرفت أنى مش تايه

أنا عند الزمن أجير

كتب على جسدى

أنى للقدر حبيب

والقدر قبل ميلادى نصيب

وتحركت كل الحروف

صرخت قالت اقرا

من غير خوف

دا أنت مع الأيام نجيب

من غير آه أو حتى نحيب

واتجمعت كل الحروف

رسمت سهم فى القلب

يصيب

بريشة الزمن

أنى أنا فى الدنيا

عنها وفيها عن كل الوجوه

غريب

سطرت دموعى حلم مستحيل

زى عش أبات فيه فوق النخيل

مكتوب فى أول سطر

يا ريتنى ما عرفت القراية

ولا كانت لى بداية

يا ريتك يا غريب

كانت بدايتك

نهاية

***