طلاب بالدبلومات الفنية يستغيثون بوزير التعليم لحل مشكلة التنسيق

أرسل العديد من طلاب وخريجى الدبلومات الفنية، أطلقوا على أنفسهم "حملة تمرد طلاب التعليم الفنى"، استغاثة للدكتور طارق شوقى بالنظر فى إعادة منظومة التنسيق للدبلومات وزيادة أعداد المقبولين بالكليات والمعاهد.

وقال الطلاب فى شكواهم: "إحنا طلبة الدبلومات والمعاهد الفنية، بصراحة التنسيق جه السنة اللى فاتت عالى أوى عن كل السنين اللى فاتت ومفيش أى اهتمام من الوزارة ولا حتى عايزه تحاول إنها تحل مشكلتنا، هو مش برضو الوزارة اللى قالت التعليم الفنى نهضة للمجتمع، طب إزاى وهما رمونا آخر حاجة فى التنسيق وخلونا بعد الثانوية العامة والشهادات المعادلة والـig والشهادات الأزهرية لغاية ما اكتفوا بأماكنهم فى الكليات وخلونا إحنا كمالة عدد فى الأخر وعلو علينا التنسيق".

وأضاف بيان الطلاب: "إحنا أهو اتعلمنا وهما اللى قضوا على حلمنا، نقول إيه للأجيال اللى جاية، نقولهم اقتلوا حلمكم بأيدكم قبل مايصحوا ويلاقوا الواقع حاجه تانية، نطالب الوزير بزيادة عدد مقاعد الدبلومات والمعاهد الفنية فى الجامعات، كان زمان اللى بيجيب ٧٥٪  بيدخل كلية".

وتابع البيان: "طلبة التعليم الفنى ليسوا فشلة، لهم الأحقية فى معظم الكليات مثل طلبة الثانوية العامة، طالب الثانوية الناجح فى الدور الثانى يدخل كليات مثل التجارة والحقوق وهكذا، بينما طالب التعليم الفني الحاصل على مجموع 90% لا يدخل أى كلية، نطلب من الوزير وضع بعض الكليات لطلبة الدبلومات والمعاهد الفنية ونزول التنسيق عن العام الماضى لأن بعض الطلاب لم يدخلوا أى كلية أو معهد بسبب ارتفاع التنسيق".