سالم المراغى يكتب: يا ضــحـكـة الفـجـــر

يا ضحكة الفجر البعيدة

كفاية عذاب ..

قربى ..

لا تغربينى ولا تتغربى

متعذبينيش

لأن ما فيش فجر بعيد

فيه ضحكة بعيدة

لكن الفجر ع الأبواب

قضينا العمر فى تناحر

عايشين فى أنفسنا أغراب

م الأخر

لوم وعتاب

عايشين فى أنفسنا أغراب

وبدال ما نهزم الغربة

انهزمنا بالاغتراب

مساجين خلف التاريخ والأبواب

متواكلين ومنتظرين

فجر

ومعاه ضحكة

واثقين الفجر هييجى بكرة

أه .. بس الفكرة

والسؤال

عن الفجر اللى جاى بكرة

الضحكة هتيجى معاه

ولا متجيش ؟

يااااااه يا من يعيش

الحلم اللى غاب

كتير من الليالى  

مصحوبة بالغيم

ونجمها كداب

كنا وما زلنا نستناه

ااااااه

وطول الاحتراب ده ما يعنيش

إنه ما يجيش

أو طول الوقت أعيش درويش

أحلم أحلام سراب

إيه اللى غيرنا وغربنا؟

إن كنا عرب ولا أعراب

كل يوم تشتد السهام وتزيد

نبال وحراب

والمسمى ربيع عربى

بس الأكيد ربيع خراب

بيقولوا علينا

شاطرين بس فى التلوين

وفـــ نبش التاريخ

كما التلاميذ فى حصة الألعاب

نرسم ونلون ونشخبط

رسومات عذاب

وإن ما لقيناش داحس

ولا بسوس

أو غبرا نرسمها

نرسم كابوس

ونهار عتمة وضباب

ورغم التأكيد قبل القمم

فى الحصة

على شحذ الهمم

كبار وصغار وأنه ما خاب

من استشار

نفس القصة

قبل البيان الختامى

تتسرب الأسرار

رغم الوعود ببزوغ فجر

كلام الليل مدهون بالزبدة

تطلع عليه شمس النهار

وقفت على جثثنا

ضباع ودياب

ناس أغراب

وبمساعدة بنى جلدتنا

ما بين سمسار

وعربى ومستعرب

وعراب

حوالينا وجوه بيوتنا

وفوق السطوح

يسرح ويمرح ويجى ويروح

أه للغريب مسموح

عاشق ومعشوق

وأحباب

وعلى الجثث

بيشربوا الأنخاب