منة الله جابر تكتب: وياما فى الحياة مجاريح

كلنا بتعدى علينا مواقف واحداث فى حياتنا بتغيرنا فى اللى بيتعلم منها وفى اللى بتعلم معاه وفى اللى بيبقى بعدها شخصية تانية خالص.. !

فى رحلتى القصيرة قابلت ناس كتير عدوا بوجع كتير كسرهم غير ملامحهم خلاهم ناس تانية حول الطيبة اللى جواهم لقسوة بقوا بينتقموا من كل حاجة وكل الناس وأحيانا من نفسهم وقابلت برضو الناس اللى الوجع ماثرش فيهم سابهم زى ماهما بملامحهم الطيبة بروحهم الحلوة والضحكة اللى مرسومة دايما على وشهم.

فى فترة من الفترات اتعرفت على شخصية طيبة جدا ومن جواها حلوة جدا بس قاسية جدا الشخصية دى بتعاند نفسها قبل ماتعاند اللى حواليها من كتر مااتوجعت بتبين لكل الناس إنها جامدة بزيادة غامضة وحشة برغم أنها من أنظف الشخصيات اللى عرفتها بس ساعات الوجع بيخلينا نحبس نفسنا فى قلعة أسوارها عالية عشان محدش يقدر يوجعنا تانى.. نوهم الناس إننا وحشين وأحيانا كمان بتبدأ تأذى قبل ما تتأذى.. الشخصية دى حبت تانى برغم أنها كانت اتجرحت من حبها الأول وكانت رافضة أنها تحب لدرجة أنها أذت الشخص اللى حبته ده بكل الطرق عشان ميحبهاش.. كانت على طول توصله أنها ولا فارق معاها برغم أنها كانت هاتموت عليه.. الشخص ده صبر عليها كتير بس دايما كانت كل ما تلاقى نفسها قربت خطوة منه تختفى كأنها بتعاقب نفسها أو بتثبتله أنه عمره ماهيمتلكها وأنه ممكن فى لحظة تمشى كانت خايفة منه ومن أنه يجرحها كانت دايما بتعاقبه على ذنب معملهوش..!

الحياة فيها الحلو والوحش وربنا دايما بيحطنا فى اختبارات عشان نتعلم نقوى ساعات الدرس بيكون كبير شوية وممكن نقع ونتوجع بس الناس اللى حوالينا مالهاش أى ذنب.. الناس اللى بتحبنا بجد مش هى اللى وجعتنا.. ناس كتير لما بتنجرح من حد بتبدا ترد نفس الجرح لأول حد يقابلها إحنا كلنا بشر مش ملايكة كلنا أتوجعنا ووجعنا بس برضو كل إنسان فينا ليه طاقة يقدر يتحمل بيها ويعدى مفيش حد فينا مضمون.. أنت أصلا مش ضامن أنك تصحى الصبح أو تكمل لساعتين كمان قدام اللى هيصبر عليك النهاردة مش هيصبر عليك بكرة واللى هيسامحك النهاردة مش هيقدر يسامحك بكرة.

لازم تتعلم انك تعدى تكمل وتعيش.. لازم تتعلم أن اللى جرحك هايجى اللى يجرحه أصل الدنيا سلف ودين وأنت برضو لما هتجرح هايجى اللى يجرحك تانى ماهى أصلها دايرة وكلنا دايرين فيها.. خلى الوقعة اللى توجعك تقويك أكتر من الأول متكسرش حاول تحافظ على كل حاجة فيك حاول تحافظ على الناس اللى بتحبك بجد وعايزة تشوفك سعيد..

خلى عندك إيمان إن اللى هيضيع مش هتعرف ترجعه تانى حتى لو ندمت عمرك كله عليه.. حاول مرة واتنين وتلاتة.. خلى ضحكتك مالية وشك.. اعرف ناس حياتهم مليانة بلاوى وبرغم ده ناس بشوشة تحب تبصلهم كتير من كتر ماهما بيضحكوا ويقفوا جانبك حتى فى اضعف حالتهم عمرك ماترحلهم ضعيف إلا وترجع من عندهم قوى.. خليك انت الحاجة الايجابية فى حياة الناس اللى حواليك .. حب تانى الحب حلو حب اللى يستاهل انه يتحب عشان أنت تستاهل إنك تعيش مبسوط وتتحب ..