فى ذكرى رحيله.. تعرف على قصة مقلب على الكسار فى مذيع الإذاعة المصرية

خلال لقاء وحيد للفنان الكبير الراحل على الكسار قبل وفاته بعام واحد، حل ضيفا على الإذاعة المصرية، فى لقاء مطول تحدث عن تاريخه الفنى ومدى رضاه عنه، وظل يروى العديد من المواقف التى تعرض لها.

وقال على الكسار، حدث لى موقف لا أستطيع أن أنساه .. "مرة ربنا قدرنى واشتريت خروف قبل العيد بيومين ووديته على البيت والشقة اللى احنا فيها ماكنش فيها مكان يصلح للخروج سوى الجمام وحبسته بالحمام .. وجت بنت صغيرة من أحفادى وفتحت الحمام وطلع عليها الخروف وفضل يتمشى فى الشقة ودخل أوضة النوم .. فوقف أدام المراية فافتكر فى خروف تانى راح نطحه وكسر المراية وخد بعضه ودخل المطبخ لقى صفيحة الجاز وشرب منها .. فوقعت فى مشكلة كبيرة لأن الخروف لحمه كله بقى جاز  فقولت أوصى الجزار على لحمة ونخلى الخروف شوية .. روحت للجزار فقابلت صديقي وحكيت له على قصة الخروف .. فقالى بسيطة أوى اعمله غسيل معدة.. ولا أقولك ماتتعبش نفسك هات الإسعاف.. فاتصلت بالإسعاف وبلغتهم بالحادث قالوا لى أن ده مش من اختصاصنا وقفلوا السكة .. أنا افتكرت إنهم كسلانين .. روحت جبت تاكسى وخدت الخروف وروحت على الإسعاف .. نزلنا من التاكسى وقولتهم فى الإسعاف عاوزين نعمل غسيل معدة للخروف ده علشان شارب جاز بصوا لبعض وضحكوا وواحد ميل عليا وقالى اركب انت والخروف .. بصيت لقيت نفسى فى مستشفى ماعرفهاش .. بصيت لقيت واحد دكتور يعرفنى .. قالى ايه اللى جابك هنا قولتله أنا جاى أعمل غسيل معدة للخروف.. قالى انت عارف انت فين دلوقتى قولتله والله ماعرفش قالى أنت فى مستشفى المجانين .. قولت "ياخبر اسود" فقالى روح بسرعة أحسن ما يثبتوا جنانك .. خدت الخروف وروحت ع البيت.. دخلت المطبخ لبست حلة وهات يا نطح فى الخروف لحد ماصحيت من النوم" .

فما كان من مذيع الإذاعة إلا أن ضحك وقال للكسار " انت بتسرح بيا يا أستاذ على".