راندا جاد تكتب: يوما ما سأذهب وحدى بعيدا

وربنا، وحياة النعمة لاسيبلكم البيت واطفش تصحوا ماحتلاقونى.. مقولة كل الأمهات المصريات، تقولها الأم المصرية ويرفع الزوج عينة للسماء ويقول يارب ، والأولاد يغمزوا لبعض بمعنى أن أمنا دى بتهدد ومش حتمشى. والأم تكون عارفة أن جوزها بيدعى وأن أولادها بيغمزوا وأنها لا حتمشى ولا حتى حتروح للبقال اللى تحت البيت .

طيب وبعدين ، أكيد فيه شىء غلط، أكيد فيه حاجة مخلية البيوت مكهربة، والنفوس ملمسة، والقلوب محملة لأعلى فولت.

البيوت مقفولة على أصحابها وشايلة أسرار، خيانة على بخل على قلة رجولة وقلة أنوثة، شوية حبشتكانات كدة مخلية الحياة تكاد تكون مستحيلة . مفيش طرف ناوى يتغير علشان التانى، بصراحة صعب إن الواحد يتغير، الأسهل أن الطرفين يقبلوا بعض بعيوبهم.

الستات اتغيرت كتير عن الأجيال السابقة ، الست دلوقت لازم تاخد حقها وماتسمحش بأى غلط أو تتجاوز ، رفضت ربط حياتها ومتعتها بوجود الزوج ، رفضت أنه يتحكم فى تصرفاتها ويعمل دور الوصى عليها ، الستات بيعملوا كل شىء وحدهم دون اللجوء للزوج  .اشتغلوا و راحوا الأندية و المولات ، ساقو السيارات وركبوا سيارات الأجرة ، نطوا فى المشاريع ، سافروا لوحدهم أو مع أولادهم بعيد. صرفوا على بيوتهم أو ساهموا بنسبة كبيرة . دة واقع مش خيال ، الخيال إن الراجل لسة فاكر نفسه وصى عليها..

صعب تطالب الست ماتبقاش مستقلة لكن الأسهل أن الراجل يتقبل استقلالها، ومش معنى أنها مستقلة أنها تلغى كيان ووجود الراجل، مهما الزمن اتغير والعادات اتغيرت، يفضل الراجل له احترامة والكلمة العليا بالتشاور والاحترام، لا يمكن تلغى دور الراجل أو يتهمش.

لازم الست تهتم بنفسها كتير مش شوية. مش لازم تحمل نفسها فوق طاقتها وتتحمل أعباء الغير وبعدها تصرخ وتولول. مش لازم تدلع وتدادى فى أولادها وتطالب زوجها أنه يساعدها فى دلع أولادها.

شيلى من واجباتك اللى فرضتيها على نفسك كل شىء يهين أنوثتك، وما تحمليش نفسك أى واجب يقلل من رجولة زوجك فى نظرك حتى لو هو موافق. علمى ابنك الرجولة وأنه يعتمد على نفسه وينزل يشتغل أول ما يعدى الستاشر. علمى بنتك الأنوثة وعزة النفس وأنها مش خدامة لأخوها لأنها بعد كدة حتبقى خدامة لزوجها. علميهم يساعدوكى فى الأعباء المنزلية وشراء مستلزمات البيت، أما الزوج لو لم يستجب  ماتزنيش لأن كان وراة فى يوم من الأيام أم عملت زيك ودلعته وهشتكته.

الحياة بين الزوج والزوجة لازم تتبنى على المودة والرحمة والاحترام، لازم الطرفين يتأقلموا على عيوب بعض مش يحاربوا علشان يغيروا بعض .