راندا جاد تكتب: خربش أكتر.. تكسب أكتر

خربش أكتر.. تكسب أكتر،  خربش الكارت، تكسب هدية،  ولو خربشت اكتر ممكن تكسب عربية، خربش الكارت يظهر الكود اللى حتستخدمه لعمل مكالماتك اليومية، خربش خربش خربش .. اتعودنا نخربش علشان نكسب  وكل ما نخربش اكتر حنكسب اكتر.

الخربشة أصبحت أسلوب حياة وثقافة مجتمع، بنغذيها فى اولادنا وهم صغيرين ، من أول المراجيح تلاقى الواد مفعوص كدة وقاعد على المرجيحة وقت طويل وواقف جانبه أولاد صغيرين عاوزين يركبوا شوية وهو ولا هنا، والمستفز تلاقى الأم الفاضلة واقفة جانبه  ولا هى هنا، بالعكس دى بتغمزله علشان يفضل قاعد على المرجيحة.

خربشى العريس وطلعى كل اللى فى جيوبة، أصل كل ماتخربشى العريس غلاوتك حتزيد، خربش زوجتك وانتقدها كتير علشان ماتتعوجش عليك فى يوم من الايام ، خربشى مرات الابن  وبلاش تشكرى فى أكلها ونظافة بيتها ومجهودها مع أولادها علشان ماتفتكرش نفسها عملت اللى ما يتعملش، خربش فى أولادك واشتمهم وانتقدهم علشان يخافوا منك ومايغلطوش، خربش فى زميلك فى العمل علشان تاخد منه الترقية وتعلى مركزك، خربش فى رئيسك علشان يخاف منك ويديلك امتيازات  وعلاوات ولوماعرفتش تخربشة نافقه وبغدده، خربش فى مرؤسك علشان يخاف يطلب حقة و ادى الحق للى ينافقك او يخربشك ..، كل ماتخربش كل ماتكسب اكتر.

بقينا بنخربش فى بعض كتير وبقينا بنتحرك فى دائرة مغلقة، كل واحد بيخربش اللى قدامه وبيتخربش من اللى وراه، المشكلة بقت ازاى توقف الخربشة وانت فى الدائرة ؟ طيب لو وقفت خربشة اللى ادامك برضة اللى وراك حيخربشك،

من كتر الخربشة، ربنا رزقنا باللى يخربشنا كلنا، خربشونا وعلموا علينا واحنا مش قادرين ندافع عن نفسنا لاننا مشغولين بخربشة بعضنا.

لازم الدائرة تتكسر ونوقف خربشة ويكون القرار جماعى، مش مهم مين يبدأ، المهم حد يبتدى، ممكن نبدأ من جوانا ومن بيوتنا، بلاش نخربش شركاء حياتنا واولادنا، بلاش نخربش أزواج أولادنا وزوجاتهم، بلاش نستقوى على الضعيف لان الضعيف بكرة يقوى ويستقوى، يلا نتقى ربنا فى كل أفعالنا ونفتكر اننا حنقابل رب كريم فى يوم من الايام.

كفاية بجد......كفاية خربشة، لازم نفوق ونبطل ونقوم ندافع عن نفسنا ونشتغل بجد ونشغل كل وقت فراغنا، بلدنا تستحق مننا نتغير ونشتغل ونركز معاها شوية، بلدنا تستحق نفكر فيها مع تفكيرنا فى نفسنا.