مفاجآت جديدة فى اعترافات خطيبة طالب الرحاب المقتول: حبيت بسام من 2 إعدادى وكان بيغير عليا وعشنا زى المتجوزين بالظبط.. وتعترف: "أبويا قالى هادفنه حى فى حفرة كبيرة".. وتكشف: قبل ما يموت قالى خدوا كل حاجة وسيبونى

تنفرد  "اليوم السابع" بنشر نص التحقيقات فى القضية رقم 9820 لسنة 2018 جنايات الشروق والمقيدة برقم 575 لسنة 2018 كلى القاهرة الجديدة برئاسة المستشار أحمد حنفى المحامى العام الأول للنيابات، والمعروفة إعلاميا "بمقتل طالب الرحاب".

 

وكشف نص التحقيقات مع المتهمين العديد من المفاجآت والروايات الجديدة التى يرويها المتهمون بأنفسهم، ستكشفها "اليوم السابع" تباعا.

وفجرت المتهمة "حبيبة أشرف"  العديد من المفاجآت فى اعترافاتها، أكدت من خلالها الاشتراك فى قتل الطالب "بسام" خطيبها، وكشفت خلالها كواليس ما حدث ولم ينشر من قبل، وإلى نص التحقيقات.

س: اسمك وسنك وعملك؟

ج: اسمى حبيبة أشرف 20 سنة، طالبة بكلية الهندسة بالجامعة البريطانية.

 

س: ما قولك فيما هو منسوب إليك بأنك متهمة وآخرون بقتل المجنى عليه بسام أسامة عمدا؟

ج: محصلش

 

س: ما هى تفصيلات حدوث الواقعة وظروف ضبطك تحديدا؟

ج: هو اللى حصل أن أنا كنت فى المدرسة واتعرفت على بسام وأنا فى 2 إعدادى، وهو كان وقتها فى ثانوى، وحبينا بعض وبعد كده العلاقة أتطورت ووصلت لحد معاشرة الأزواج، وأنا عرفت أهلى أنى بحبه وجيه قعد مع ماما وتعرف عليها، ومن الوقت ده علاقتنا كل يوم كانت بتكبر من 8 سنوات وبقنا نحب بعض أوى، والعلاقة بينا كانت قوية أوى كانت زى المتجوزين بالظبط، وبعد سنة ونص صارحته ان أبويا مزور شهادة وفاة ليه، وأن اسمه شريف، فقالى أنه ولا كأنه سمع حاجة وأنه عايز يكمل معايا.

 

من شهر 9/2107 ابتديت تظهر المشاكل بسبب الغيرة عشان كان عندى صحاب ليا فى الجامعة، وفى يوم كان الدنيا شتا روحت أغير هدومى وهو كان معايا فلبست " بنطلون مقطع" على الموضة، فقال لأمى خليها متلبسش البناطيل دى تانى عشان مقطعهاش، ورجعنا الجامعة واحنا فى العربية، قالى أقفى هنا وشد النضارة بتاعتى ورماها فى عينى عملى تجمع دموى، وخد منى الموبيل وضربنى فلميت عليه الناس، قالهم دى خطيبتى ملكوش دعوة، وكانت دى أول مشكلة بينا.

 

وفى يوم 17/8/2018 دخل أبويا عليا الأوضة وقعد يتكلم معايا وقالى أنا عايزك تجبيلى بسام يوم 19/8/2018 فى الرحاب، سألته ليه؟، قالى أنه هيقتله وأنا سألته هتقتله إزاى، فقالى فى ناس هتيجى ياخدوه، وبعدها بساعات قالى أنه عامل حفرة فى الرحاب هو واخدها وأنه هيدفنه بالحياة بعد ما الناس تكتفوا، وأنا ساعتاه وافقت، وكلمت بسام قولتله تعالى بابا عايز يقابلك عشان هيديك فلوس 250 ألف جنيه اللى وعدك بيهم عشان توضيب السكن.

 

يوم الأحد روحنا أنا وأبويا والسائق يحيى لشقة الرحاب، وشوية وجيه عمو باسم ومعاه ناس قعدوا فى الشقة، وروحنا أنا ويحيى نجيب فطار ليهم، بعدها بسام اتصل بيا وقالى أنه داخل على البوابة بتاعة المدينة، روحت جيبته ووديته الشقة ودخلت أنا وهو وكان موجود بابا ويحيى وناس معرفهمش، وباب كان مستنى بسام فى الأوضة اللى فى الوش، دخلت أنا الأول ووقفت فى الصالة وأبويا نادى على بسام فدخل جوه الأوضة، وهو رايح فى الطرقة الناس اللى كانوا موجودين كلهم بره، دخلوا ورا بسام فى الطرقة كلهم ماعدا يحيى.

 

 

أنا سمعت صوت بسام بيستغيث بيقول "سيبونى وخدوا كل اللى أنتوا عايزينه"، ولما صوت بسام طلع المتهم باسم استخدم شنيور عشان يدارى على الصوت، وفضلوا قاعدين جوه أكتر من 5 دقايق، وقتها عمو باسم خد من بسام الموبايل وطلع سألنى على دبوس عشان يطلع الشريحة من تليفون الإيفون، وكان موجود ساعتها أسلاك حديدية سودة طلع بيها الشريحة، وأدها لبابا ودخل تانى، بعدها خرج عمو باسم ومعاه التليفون وقالى خدى امسحى كل اللى عليه قولتله أنا معرفش الباص ورد، خد منى الموبيل ودخل لبسام وقاله أنت بتفتح الموبيل بانهى صباع وفتح التليفون، حاولت امسح كل اللى عليه بس معرفتش برده.

 

بعدها عمو باسم مشى هو والناس اللى معاه ويحيى راح يوصلهم، وقعدت أنا وبابا وبسام بس فى الشقة، دخلت عليهم الأوضة لاقيت بسام على السرير ومتكتف من أيده ورجله وبلاستر على بوقه، وبابا واقف قدامه وفضل يزعق بس مش فاكرة الكلام، وأنا قعدت أعاتبه وأقوله "ليه وصلتنا للى احنا فيه دلوقتى، أنك تقول أنك كنت بتنام معايا، ورغم أن كان على بوقه بلاستر صوته كان مفهوم وقالى "مش هاجى جنبك تانى"، قولت لبابا يسيبه قالى مينفعش لو سبته هيفضحنا وقالى أنه هيقتله، فاخدت التليفون والشريحة وفلوس وركبت تاكسى ومشيت روحت عن واحدة صاحبتى.

 

بعدها روحت سهرت مع صحبتى فى مول ورجعت البيت الساعة 11 بليل، تانى يوم سالت أبويا على بسام قالى أن فى ناس خدته وهما فى العربية مات من ريحة النشادر، ولما سالته تانى قالى أنه مات وانه دفنه بالجبل، فضلت منهارة بعدها سافرت الغردقة عشان متمسكش.

س: ما هى علاقتك بالمجنى عليه بسام أسامة؟

ج: هو خطيبى.

 

س: منذ متى تلك العلاقة تحديدا؟

ج: من حوالى 8 سنوات.

س: ما هى ظروف تعارفك على المجنى عليه؟

ج: احنا اتعرفنا على بعض من أيام المدرسة وكنا بنحب بعض جدا.

 

س: ما هى طبيعة العلاقة فيما بينك وبين المتوفى؟

 علاقة حب.

س: ما هى حدود تلك العلاقة؟

ج: احنا كنا بنتعامل مع بعض زى المتجوزين.

 

س: هل تم الزواج فيما بينكم أو حدثت خطبة؟ 

ج: لا.

 

س: ما الذى حال دون ذلك؟

عشان أهلى قالوا مش هتخطب وأنا كنت فى المدرسة وكنت لسه داخلة أولى جامعة السنة اللى فاتت.

 

س: كم عدد المرات التى حدث بها العلاقة غير الشرعية بينك وبين المجنى عليه؟

 

ج: كانت كتير جدا.

س: منذ متى وبدأت العلاقة غير الشرعية؟

ج: من حوالى 3 سنوات ونصف لحد حوالى شهر ونصف من تاريخ اليوم.

 

س: أين كانت تحدث تلك العلاقة غير الشرعية؟

ج: كانت بتحصل عندى فى البيت لما أهلى يكونوا مش موجودين، أو عندهم فى البيت لما أهله ميكونوش موجودين.

 

س: ما هى الفترة الزمنية بين كل علاقة غير شرعية والتى تليها؟

ج: مكنش فى وقت معين على حسب ظروفى تسمح أو هو فاضى، لكن كنا بنعملها كتير.

س: هل ترتب على العلاقة غير الشرعية فض غشاء بكارتك؟

ج: أيوة من بدايتها.

س: كيف تأكدتى من ذلك؟

ج: عشان نزل منى دم.

س: متى تحديدا تم فض غشاء بكارتك؟

ج: من حوالى 3 سنوات.

س: كم عمرك تحديدا حال بداية تلك العلاقة غير الشرعية؟

ج: 16 سنة.

س: من القائم على ارتكاب تلك العلاقة غير الشرعية وفض غشاء بكارتك؟

ج: هو بسام أسامة.

 

س: هل قام أحد بخلاف سالف الذكر بارتكاب تلك الواقعة الأثمة معكِ؟

ج: لا هو بسام بس.

س: هل نتج عن تلك العلاقة حدوث حمل؟

ج: لا.

س: هل تم تحرير أى عقود زواج رسمية أو عرفية بينك وبين المجنى عليه؟

ج: لا بس بسام كان عايز يعمل ورقة عرفى وأنا كنت عايزة الزواج الرسمى.

س: هل والدك أو والدتك على علم بتلك العلاقة غير الشرعية بينك وبين المجنى عليه؟

ج: هو كان أمى سمعت أنا وبسام بنتخانق فى التليفون، أن عايز يسيبنى ويفضحنى ويقول لكل الناس أنه بينام معايا، والكلام ده كان فى شهر مايو 2018، لما كان بيحصل مشاكل بينا وأمى سألتنى عن الموضوع، قولتلها محصلش.

س: هل كنتى على علم بأن عقب قيامك باستدراج المجنى عليه سيتم قتله؟

ج: أيوة أبويا كان قايلى، وأنا وافقت على كده وأنى استدرج بسام وأجيبه عشان أبويا يقتله.

س: ما سبب قيامك بمحاولة إزالة الملفات التى توجد بهاتف المجنى عليه؟

ج: بابا قالى أنى امسح كل اللى عليه عشان كان عليه صور ليا بالمايوهات وامسح كل الشات اللى عليه.

س: ما هو رد فعلك عقب معرفتك بمقتل المجنى عليه؟

ج: جالى انهيار عصبى وخدت مهدئات كتير وامتنعت عن الأكل.

س: كيف كان ذلك وأنتى الذى قمتى باستدراجه وعلى علم أن والدك سيقوم بقتله؟

ج: لأنه صعب عليا وندمت.

س: ما قولك فيما جاء بمحضر التحريات باشتراكك وأخرون بقتل المجنى عليه؟ 

ج: محصلش وأنا مقتلتش بسام ومعرفتش أنه اتقتل غير تانى يوم.

س: هل تتعاطى أى من المواد المخدرة أو المسكرة؟

ج: لا.

س: هل تعانى من أى أمراض نفسية أو عصبية؟

ج: لا.