محمد زكريا حبيشى يكتب: تسابيح

تقول عيونا كلام

بس اللسان أخرس

سايبنها للأيام

بس السكات أشرس

يا قلب طير قولها

وألمس سطور قلبها

قول الشعور وأخلص

واخلص لنظرتها

و لا مرة تستسلم

واكسر حيطان عجزها

وبسرعة روح سلم

وأوعاك يهدك ريح

انهى صلاة فجرك

بالمغفرة وتسابيح

وادعى تكون جنبك

ما هو يإما عشت جريح

من قبل ضحكتها

كنت الرماد ف ضريح

إيه صحى فيك صوتها

وأنت اللى كنت صريح

طب ليه تموتها

جيب م النجوم فستان

ومن القمر وردة

وافرش لها بستان

بمحبة ومودة

وإزاى تعيش إنسان

لو حبها هدا

إن كنت بحر غريق

هغرق وأقول عادى

وإن كنت صهد حريق

هضحك واكون هادى

بس المهم أوعاك

لحظه تغمض يوم

وأنت هنا قصادى

فرض الحنين بالعين

والاشتياق قواه

مهما تاخدنى ل فين

قربك نعيم أو جاه

وإن كنا حتى اتنين

فانت الجسد و الروح

شىء مستحيل أنساه

وأنت الشطوط والنور

وأنت اللى بتمناه