منة الله جابر تكتب : عيد الحب مابين مؤيد ومعارض

بما أنه فاضل كام يوم على عيد الحب اللى بيجى كل سنة فى يوم 14/2 وبيحتفل بيه كل الشعوب على مستوى العالم كان لازم نتكلم على الظواهر الغريبة والمريبة اللى بنشوفها كل سنة الحقيقة أن الظواهر دى بدأت تحول عيد الحب من يوم جميل ليوم الناس اصلاً مبقتش تحب تنزل فيه وترتاح أكتر بالقعدة قدام التليفزيون وطبق الفشار المحترم ..

خلينا نبدأ ببعض المظاهر دى على سبيل المثال وليس الحصر ..

- الدباديب انا مش عارفة مين اللى اقنع الناس أن الاحتفال بعيد الحب يعنى دبدوب احمر كبير معلش فين مظاهر الحب اللى فى دبدوب اكبر منك ايه الرسالة اللى وصلها الدبدوب للطرف التانى .

- الاطفال او كل من هم اقل من 18 سنة انا معنديش مشكلة انك فى السن ده تكون بتحب ماما , بابا او حتى الميس فى المدرسة بس انك تكون بتحب/ بتحبى وفى شخص تانى ماشى معاك فى الحدوتة فى السن ده .. ده اللى مش قادرة استوعبه الصراحة طب بتحبوا فى بعض ايه ؟؟ بجد الموضوع ده محيرنى جداً .

- كمية اللون الاحمر اللى بتكون فى كل حتة فى الشارع الناس الكتير اللى بتكون لابسة احمر ليه ها بجد ليه ؟؟

ليه عشان احتفل ألبس احمر واوجع عيون الناس طب مااحتفل وألبس ازرق عادى ايه المشكلة مش هنتبسط مثلاً غير واحنا الاتنين لابسين كده على فكرة الاحتفال مش باللبس اطلاقاً .

- نيجى بقا للسناجل والحملة اللى بتحصل قبلها باسبوع او يمكن من اول الشهر والنحيب المستمر على مواقع التواصل من امثال " انا ثابت على موقفى من 2011 " " هو احنا مش هنتحفل بقا ونبقى زى الناس وزعوا تانى ياجماعة انا ملحقتش كنت نايم وإلخ ....

- اليوم الوحيد اللى متلاقيش مكان تقعد فيه كل الكافيهات بتكون محجوز يعنى تخلص شغل وعلى البيت جرى ولا حتى تعرف تمشى فى الشارع وكأن الناس اللى بتحب لو مشافتش بعض اليوم ده يبقى عيب فى حق علاقتهم اللى قايمة على اليوم المثالى ده !!

تعالوا اقولكم رأيى الشخصى واللى بيمثلنى انا ولا امثل اى شخص آخر انا مع عيد الحب جداً على فكرة وبحترمه بس مش بستناه لانى ببساطة مؤمنة جدا أن كل يوم حلو بيعدى هو عيد حب كل يوم بيحصل موقف جديد فى علاقتك يخليك ياتاخد خطوة لقدام ياتوقف وتفكر هو ده الشخص الصح ولا لا ؟!

- الهدية مش لازم تبقى دبدوب كبير عايزين خمسة يشيلوه معانا ولا لازم تبقى حاجة وواو غالية بشكل يخض لا على فكرة ممكن كلمة حلوة تبقى هدية ممكن لمحة بسيطة تبقى هدية ممكن شوكولاتة بتحبها تبقى هدية ممكن حاجة كان نفسك فيها حتى لو كانت رخيصة تبقى احلى من احلى هدية .

- مش معنى انك سنجل فده معناه انك متحتفلش بعيد الحب ويبدأ الحزن يسيطر عليك طول اليوم والاكتئاب يبقى واضح على ملامحك لانك ببساطة سينجل وحيد يائس معلش ثانية واحدة مين قالك أن عيد الحب للاتنين المرتبطين بس على فكرة ده لكل حد بتحبه .. عيد الحب هو عيد لكل الناس .

نصحية بقا للاطفال وكلا من هم اقل من 18 سنة احنا كل سنة بنكبر عقلنا بيتغير وتفكيرنا بيتغير واللى مقتنعين بيه النهاردة وارد جداً نبقى مش مقتنعين بيه بكرة احلامنا .. اهدافنا ..

دى دعوة منى انكم تعيشوا طفولتكم ومراهقتكم عيشوا حياتكم واشبعوا منها اعملوا ذكريات كتير حلوة تفرحوا وانتم بتتكلموا عنها سافروا العبوا كتير اعملوا لمستقبلكم لانكم لما تكبروا هتندموا على كل وقت ضيعتوه فى جزء ولو صغير من مشاعركم هتندموا لما تقابلوا الشخص الصح وتكونوا تعبتوا من الناس الكتير الغلط اللى ضيعتوا معاهم احلى فترة فى حياتكم .. هتندموا انكم ضيعتوا برائتكم وعيشتوا حاجات كان لسا بدرى عليها ..