فيديو وصور..ملاك فى العزبة البيضاء بالمرج..هبة تحمل زوجها المريض على ظهرها منذ 6 سنوات للمستشفى رايح جاى..وتدبر أمور بيتها ومصاريف العلاج بـ450 جنيها..والزوج:أمى شالتنى 9 شهور وأنا جنين ومراتى شالتنى6 سنين مريض

هبة تحمل زوجها 6 سنوات لتلقى العلاج

كتب رامى محيى الدين

الخميس، 15 مارس 2018 01:02 م

صورة لسيدة تحمل زوجها على ظهرها التقطها أحد رواد مترو الأنفاق فى محطة المطرية ورفعها على حسابه بموقع التواصل الاجتماعى، الأمر الذى لقى ردود فعل كبيرة، "اليوم السابع" بحث عن السيدة ليحكى قصتها للرأى العام وتوصل إليها فى شقة بالدور الثالث فى العزبة البيضاء بالمرج الجديدة.

الصورة المتداولة عبر مواقع التواصل

هبة رجب السيد ربة منزل، 32 عاما، متزوجة من خالد البدوى محمود 37 سنة، كان يعمل سائق سيارة ربع نقل فى الموقف العشوائى بالجزيرة البيضاء فى المرج الجديدة كان يعمل بلا رخصة أو تأمين، وأمه وأخيه وأولادها الثلاثة أبناء أخو زوجها المتوفى.

هبة تحمل زوجها على ظهرها منذ 6 سنوات للمستشفى ذهابا وإيابا

تقول هبة: "زوجى مصاب بفشل كلوى وفيروس بى وتضخم فى الكبد وهشاشة فى العظام وضعف فى عضلة القلب، كان تعبان من 2012 ولكنه بدأ جلسات الغسيل الكلوى والعلاج فى شهر واحد 2013، من وقتها كل يوم كنت بشيله أوديه مستشفى الحياة فى الجبل الأصفر وأرجع البيت اعمل أكل للأولاد وبعدين أروحله يكون خد الجلسة وارجع بيه على البيت".

هبة تحمل زوجها فى الشارع بالمرج

تضيف هبة: "أحيانا مش بقدر أمشى المشوار كله بشيله شوية وانزله علشان ارتاح وبعدين بكمل، ولما بيبقى معايا فلوس باخد توك توك بـ5 جنيهات وفى ناس أولاد حلال مش بيرضوا ياخدوا منى فلوس"، تتابع هبة حديثها: "زوجى بياخد 3 جلسات فى الأسبوع وأنا اللى بوديه وأجيبه محدش من اخواته فكر فى يوم يروح معايا أو بدالى مرة، ولو مكنتش أنا هشيله مين هيشيله، ودلوقتى أحنا بنروح مركز خاص بنتابع فيه الجلسات علشان الجهاز اللى كان بيغسل عليه فى مستشفى الحياة باظ وبندفع 200 جنيه كل 15 يوما، يعنى 400 جنيه فى الشهر".

هبة تحمل زوجها من التوكتوك

هبة: نعيش فى شقة مشتركة أنا وحماتى وأخو زوجى العازب و6 أطفال

تضيف: "إحنا عايشين فى شقة بتاع والد زوجى أنا وزوجى وحماتى وأخو زوجى "عازب" وأولادى 3 أصغرهم رقية 3 سنوات ومصطفى 9 سنوات وصباح 13 سنة ، مصطفى فى تانية ابتدائى وصباح فى الصف السادس ورقية لسه فى الحضانة، أنا مهتمة جدا بتعليمهم، ده بالإضافة إلى 3 أطفال كمان أولاد أخو زوجى المتوفى تركتهم والدتهم واتجوزت وسابتهم عندى، أنا ما بفرقهمش عن ولادى، وهما كمان بيقولولى يا ماما".

9c9da587-2e3b-4008-8b78-02fac4b978e4

السيدة تحمل زوجها بتلك الطريقة 6 سنوات كاملة

- أسرة هبة معاشها بـ450 جنيها

تكمل الزوجة مأساتها: "كل دخل الأسرة 450 جنيها معاش من الشئون الاجتماعية وكمان فى ناس من أهل الخير بيدونا فلوس والجامع اللى جبنا بيدينا كل شهر 100 جنيه، يعنى بيجيلنا كل شهر من أهل الخير حوالى 390 جنيها، وممكن شنطة أكل وملابس كل فترة".

- هبة نظرات ناس بتجرحنا وأخرى تواسينا

سألنا هبة عن نظرة الناس إليها وهى تحمل زوجها، وهل تتعرض لمضايقات خلال رحلتها مع زوجها إلى المستشفى وعودتها، فقالت: "أنا بركب المترو وأنا شايلة جوزى الناس بتفتكرنى داخلة أشحت عليه أو محتاجة حاجة، حتى ما حدش بيرضى يقوم لينا ولما بتعب بصرخ فيهم وأقولهم: حد يقوم للراجل التعبان ده بيغسل كلى الناس بتقوم على طول بس فى ناس بتبصلنا نظرات بتجرحنا وفى ناس تانية بتقولى ربنا يقويكى يا رب وتدعيله بالشفا".

- الزوج: أمى حملتنى 9 شهور جنين ومراتى شالتنى 6 سنوات مريض

الزوج يخرج عن صمته، قائلا: "مراتى هى كل اللى ليا فى الدنيا مهما قلت عنها مش هوفيها حقها إن كانت أمى شالتنى فى بطنها 9 شهور هى شالتنى على ظهرها 6 سنوات مش أنا بس أنا وأولادى وأولاد أخويا ربنا يكرمها علشاننا".

وتابع الزوج قائلا: "أوعى تكون فاكرها سليمة دى عندها صديد على الكلى وضغط وتليف فى الأعصاب، أنا نفسى أخف واريحها، وأشيل عنها الحمل واعوضها كل اللى عانيته معايا ومع أولادى".