راندا جاد تكتب : أوقات عصيبة

اعتذارى الشديد للكاتب العالمى (تشارلز ديكنز) لاقتباس اسم مقالى باسم روايته العالمية ( أوقات عصيبة) متمنية من الله عز وجل ان تصل مقالاتى للعالمية كما وصلت رواياته للعالمية.. والعالمية عندى هى أن تلاقى مقالاتى إعجاب القراء .

فى مصر أم الدنيا.. يوجد وقتين من أشد الأوقات التى يتعرض لها المواطن المصرى والمواطنة المصرية . يعتقد كلاهما إنهما نقمتين مع العلم أنه فى رأى الشخصى المتواضع هما نعمتان من الله..

بالنسبة للست المصرية فهى تعتبر أن وقت وقفة المطبخ من أصعب الأوقات اللى بتمر بيها فى خلال يومها . وبالنسبة للرجل المصرى فإنه يعتقد ان وقت المواصلات ماهو الا تعذيب يومى أراد الله به ان يعاقب الإنسان المصرى .  يعنى مثلا تدخل الست المصرية المطبخ وهى بتأفف وحاسة ان عفاريت الدنيا بتتنطط فى وشها   .. تقعد تتكلم مع شياطينها وتفكر ازاى تاذى الغلبان اللى قاعد جوة مستريح فى السرير وعمال يطلب فى طلبات سخيفة بالنسبة لها .. تفكر ازاى  تعكنن عليه يومه فتبدأ باللقمة الصغيرة اللى المسكين يادوب بيحطها فى بؤه النمنم .. مثلا  تزود له الملح لو بيحب الاكل دلع او العكس .. تسقط لها كم شعراية فى الاكل لعل وعسى يحرم يقولها اعملى اكل ويعمل هو .. وطبعا اهم حاجة انها تفكر ازاى تكيد لحماتها الغلبانة اللى لسانها بينقط عسل وشهد مكرر ....وتفكر فى كلام أصحابها واقاربها و تطلع فيه القطط الفاطسة ودى كان قصدها ودى كانت قاصدا تضايقنى .. ودى .. ودى  .. ودى .

طيب ما بدل ما تتحاورى مع شياطينك ممكن تعملى حاجة مهمة ..مثلا افتحى  قرأن  و حاولى تحفظيه . فكرى فى حدوتة واكتبيها لما تخلصى المطبخ يمكن تلاقى نفسك بتكتبى حلو ..... غنى يمكن صوتك يطلع حلو .. افتحى الراديو على برامج ثقافية مش عيب ان الواحد يتثقف على الكبر . لو اكلك حلو سجلى فيديو ونزليه ممكن تضرب معاكى تلاقى نفسك فى قناة فتافيت .

ومن هنا أناشد الحكومة بإعداد برامج شيقة فى الراديو تمزج بين المتعة والثقافة حتى نمنع المرأة المصرية من التحاور مع شياطينها .

وقفة المطبخ لو نقمة بالنسبة لك .. ممكن تحوليها لنعمة .

اما بالنسبة للراجل اللى بيقضى وقت طويل فى المواصلات وهو مخنوق  وعمال يخبط فى دة ويزق دة و عمال يتف على ارض ام الدنيا وطبعا محدش يقدر يكلمه الا يتف فى وشه ...ومستنى لما يرجع بيته علشان يطلع غله فى اهل بيته ..... طيب ما تجيب كتاب تقراه ...افتح جرنال ....حل السودوكو او الكلمات المتقاطعة زى ما كان زمان الرجالة بتعمل وهم فى اى مكان تلاقى الراجل واقف محترم وفى ايده جرنال وممكن اكتر .

ومن هنا أناشد الحكومة بدعم الجرنال وتخفيض سعره وجعله فى متناول الجميع حتى نحمى شوارع ام الدنيا من التفافة .

وقت المواصلات لو نقمة بالنسبة لك ..... ممكن تحولها لنعمة .

اعتقد انه يوجد علاقة طردية بين تراجع مؤشر ثقافة الشعب المصرى وبين سلوكياته ....إى أنه لتحسين سلوك الشعب يجب البدء بالاهتمام بالثقافة والتعليم . .