راندا جاد تكتب : يا فسيخك يا أم الدنيا

انهاردة شم النسيم –  مشيها انهاردة -... كل سنة وانتم طيبين وبصحة وسعادة . شم النسيم يعنى عيد الربيع يعنى حنشم النسيم العليل بعد عذاب الشتاء و رياح الخماسين  .

شم النسيم يعنى العيلة واللمة فى الجناين المليانة زهور وفراشات وريحة جميلة تنخشش فى المناخير .

شم النسيم يعنى اللبس الصيفى ألوان زاهية و قماشة طرية .

شم النسيم يعنى لب وسودانى وترمس.. يعنى فسيخ ورنجة وبصل أخضر . بتقول إيه؟  فسيخ  ورنجة وبصل أخضر ؟ ودة فين دة ؟ جوة السلخانة ؟

لا يا خفيف الروح ..  دة  فى الجناين أم ريحة زهور ومليانة فراشات . طيب بالنسبة لريحة الزهور ؟ 

ياحبيبى ريحة الزهور لو أصيلة مش حيمحوها أى ريحة فسيخ ولا رنجة . طيب بالنسبة للمنظر العام ؟

وماله المنظر العام ؟ حط الفسيخ مخلى جوة علبة شيك و البصل متقطع و عيشك وبابا غنوجك فى كيس  وادعيلى .

طيب حضرتك وبالنسبة لغسيل الأيادى والأسنان من ريحة البصل ؟

يا سلام على الحسوكة ماهو الكل حيكون وأكل بصل يعنى الهبو اللى طالع من البوء واحد .

طيب وبالنسبة للى مش بياكل فسيخ ؟

وهو ايه اللى ينزله اليوم دة ما يقعد فى بيته !