مينا جميل يكتب: تنسى إيه!؟

تنسى إيه

تنسى صوتها

ولا ضمة أيدها ليك

ولا نظرتها لـ عنيك

ولا خوفها وصوت كسوفها

تنسى بيت بيضم فيك

ولا لمستها لإيديك

ولا دمعتها لفراقك

ولا نارك واشتياقك

تنسى إيه..

وكل كلمه كتبتها.. مكتوبة ليها

كل الشوارع راسمة فيك الذكريات

ورسمت كل العمر بيها

إزاى ف لحظه يتمحى كل اللى فات

تنسى إيه !!

وأنت اللى عايش كل عمرك تفتكرها

قلبك مايصلحش إلا ليها.. ممنوع لغيرها

مرسوم عليه أصلا عنيها

م تكونشى قولت إنك هتنسى!؟.. وبتسايرها  !!

تنسى مين.. طب هى أصلا تتنسى!! ؟

دى كل تفصيله ف حياتك.. هى فيها

لو تغيب عنك للحظة بتناديها

وقت نومك جوه حلمك بتلاقيها

تنسى أنفاسها اللى كانت جزء منك

هى دى اللى بتنسى فيها كل حاجه

حتى سنك

هى دى اللى بحضن منها

 ترضى كل الدنيا عنك

هى روحك هى شعرك

هى عمرك هى فنك

تنسى حد بيحضنك ..وقت الدموع

تتسى حد بيرسم الفرحه ف طريقك

ف الضلمه بيقيدلك شموع

تنسى فرحتها بنجاحك..

لو بتضعف هى بتكونلك سلاحك

هى بتقويك كتييير ..وبحنانها عليك تغير

تنسى مين! ؟

تنسى سندك تنسى حلم حلمت بيه

تنسى حد بيتسند حلمك عليه

تنسى إيه.. لو هتنسى يبقى قلبك

الف إخص قليلين أصلا عليه