اللى خلف مماتش.. شاهد ابنة الأبنودى تلقى قصيدته "جوابات حراجى القط"

ألقت آية عبد الرحمن الأبنودى، ابنة شاعر العامية المصرية الكبير الراحل عبد الرحمن الأبنودى، قصيدة "جوابات حراجى القط" أثناء الاحتفال بإطلاق جائزة الأبنودى الذى أقامته مكتبة الإسكندرية، بمناسبة الذكرى الثالثة على وفاته.

ومن كلمات القصيدة:

 "الرسالة الأولى عن حالها فى الغياب"

اتأخرت مسافة كبيرة كبيرة علىّ

عارف فاطنه يا حراجى لاليها عايل.. ولا خى

ليه تتأخر كدة يا حراجى..؟

طب والنبى كأن ورقتك دى

أول قنديل يتهز ف جوف الدار

أول ندعة ضو

الدار من غيرك يا أبو عزيزه .. هِوّ .

وعزيزه وعيد ..

من غيرك يا حراجى زى اليُتما فى العيد .

الواد على صغره حاسس بالغربه والبعد .

ولا عاد حتى بيطلع يلعب فى القمَارى مع الولِد .

اطلع وأخش .. أطلع وأخش القاه .. غيمان

وكأنه محروق له دكان .

ويقوللى: ((فين يامه أسوان.. ؟

وأبا سابنا ليه يا مه؟ ما يمكن زعلان..؟))".

وكانت مكتبة الإسكندرية أعلنت عن منحها جائزة باسم الشاعر الشاعر عبد الرحمن الأبنودى فى فرعى شعر العامية والدراسات النقدية، للشباب من سن 20 إلى 40 عاما، وتصل مجموع الجوائز إلى 100 ألف جنيه.