نصر فتحى اللوزى يكتب: حلم.. ودعوة أم

والنبى يامه تدعيلى دعوة فى الفجرية

يطلع علينا النهار مع شمس الصبحية

تبقى حياتى متعاصة مع الدنيا عسلية

معكوكة يامه قشطة من طاجن محلبية

واشرب يامه الميه نضيفه ولقمة هنية

والبس يا حبيبتى من غزل إيدك جلابية

وابقى واد قمع عريس وعاوج الطاقية

والنبى تدعيلى تخلى حياتى كدا وردية

واشترى مرتبة بدل الحصيرة النكدية

ومعاها يامة غطا يدفينى فى الشتوية

قولى مرتبة أو لحاف إنشا الله بطانية

وأجيب بوتاجاز أعور يطبخ الملوخية

ومعاه قلتين قناوى من فخار القناوية

وفوالة الفول وطبق وطاسة للطعمية

وأنت عليكى تخطبيلى البت المهلبية

الشبكة حبى لها ومهرها قلبى وعنية

ادعيلى مرتبى يزودوه فى خانة المية

يعنى ابقى مع العدد يحضن التسعمية

أنت بتحلم أبوك رهن لينا الشكماجية

معاشه يا دوب لخمسة الشهر أولانية

***

والنبى يامه ادعيلى دعوة أكون وزير

ربنا يحقق مناك وتكون فى الدنيا زير

يامه باقولك وزير ودا مش عليه كتير

روح يا بنى وقلبى بيدعيلك تاكل فطير

فطير ايه دول خمسة وأربعين هبابير

والهبرة ألف أمنا الغولة تبصلها تغير

دول يجيبوا لك كدا كام ربطة جرجير

يامه اصحى للون هبقى عريس أمير

معاش أبوك فى السوق عاجز ضرير

أقول لها إيه؟ دا يامه من غير تقدير

دا يملا الغبيط أو مقطف من الحصير

فهمت يا بنى وده بياكله كله بالتحمير

يامه لا سليق ولا نى هو عليهم غفير

يابنى انصحه هيتحاسب على القطمير

يعنى إيه يامه؟ دا أنا جرير ابن جرير

العاقل تايه والجاهل عايش فى حرير

أبوك كان بيكمل عشاه أحلام وشخير

ياما ناس بالقناعة القليل معاهم كتير

لكن بعدالة تتوزع الثروة بدون تقتير

بكفتين الميزان بالحق يتساوى التقدير