فيديو..محمد صلاح ردا على مهاجمى كوبر: "نتايجه بترد على أى حد بيتكلم عليه"

رد الدولى المصرى محمد صلاح، نجم ليفربول الإنجليزى، على المهاجمين والمنتقدين لأداء هيكتور كوبر المدير الفنى للمنتخب الوطنى، وطريقته فى الملعب، قائلا: "نتائجه معنا ترد على أى حد بيتكلم عليه.. صعدنا لأمم أفريقيا ولكأس العالم، وفى فرق كبير جدا فى النتائج اللى كسبناها معاه.. وأنا شايف إن الأرقام والنتائج أهم كتير جدا من أولويات الناس فى المتعة بالكرة".

وقال محمد صلاح، خلال حواره مع الإعلامى عمرو أديب، ببرنامج "كل يوم" المذاع عبر قناة ON E، إن المنتخب المصرى يقدم أداءً جيدا، وخير دليل على ذلك مباراة البرتغال الأخيرة الودية.

وتحدث صلاح، عن الصعوبات التى واجهته فى بداية رحلة احترافه بالدول الأوروبية والتأقلم بها وقال: "أصعب حاجة فى التأقلم إنك لوحدك مش زى مجتمعنا مع أصحابك وتخرج وتسهر معاهم، هنا بروح التمرين وبرجع وباقى اليوم مش عارف تعمل أيه، ولا أنت تعرف البلد ولا ليك أصحاب ولا عارف تاكل أكلهم، غير فى مصر بنحب السهر وأكلنا المختلف، وبعد ما انتقلت للندن كان الأمر أسهل شوية لأن فيها عرب كتير، لكن أصعب فترة كانت فى بازل".

وكشف نجم ليفربول، عن أنه كان يطمح دائما فى أن يصبح أحسن لاعب فى الدورى الإنجليزى، وبالفعل أصبح كذلك، موضحا: "كنت شايف إنى هعمل حاجة جديدة على نفسى وعملت موسم هايل جدا.. وفى دماغى من أول يوم إنى أبقى أحسن واحد فى الدورى.. والحمد لله قدرت أكسب الجايزة وكنت مقتنع بده".