ليه الدراما الهندية الأقرب لقلوب الستات فى مصر؟

على الرغم من طول حلقاتها وبطء أحداثها بشكل مبالغ فيه، إلا أنها أصبحت جزءا لا يتجزأ من الحياة اليومية لأغلب المصريين وخاصة السيدات، هى المسلسلات الهندى التى اجتاحت الكثير من القنوات الفضائية السنوات الأخيرة الماضية ليدمنها المصريون.

وفى هذا الإطار استطلعنا آراء مجموعة من السيدات عن سبب متابعتهم للمسلسلات الهندية، حيث قالت سارة أمين: "أنا بتابع مسلسل من الصيف اللى فات ولحد دلوقتى مخلصش ورغم كدا مزهقتش لأن تفاصيل المسلسل وتصوير الأحداث لحظة بلحظة خلتنى أتخيل أنى بعيش معهم يوميا، وبالتالى أتابع ماذا يحدث فى الحلقة المقبلة بشغف"، وتابعت "أنا عندى امتحانات فى الجامعة لكن دا ميمنعش إنى أخصص وقت للراحة وفى الوقت دا اتفرج فيه على المسلسل الهندى اللى بتابعه". 

 

فيما قالت رضوى حسن (ربة منزل): "أنا بشوف فى المسلسلات الهندى المشاعر والحب اللى مش بنلاقيه فى الواقع ومشاهد رومانسيه فوق الخيال بتعيشنا فى أجواء مختلفة عن اللى احنا عايشين فيها، وجوزى الأول كان بيتضايق لما يلاقينى كل يوم مركزة فى المسلسل لكن مع الوقت بقى هو كمان بيتابعه معايا ولو حصل ظرف ومتفرجناش على المسلسل بنجيبه من النت ونشوفه سوا".

وهنا أكدت أمل محسن أخصائية علم النفس أن الكبت العاطفى وفقدان الرومانسية فى الكثير من الأسر المصرية جعلتنا نتعلق بالمسلسلات الهندية، والتى تظهر فيها الرومانسية بشكل مبالغ فيه وسط سياق درامى مشوق.