حجاج فراج يكتب: خالتى صفية

قلبك ماله قالولى عليل

قلت كلام تلقاه تمثيل...

علشان عارف قلب صفية

كله حنان و لا نهر النيل...

ياما حوانا وأحنا عواييل..

وصفية معانا طول الليل...

تحكيلنا حكاوى والمواويل

نتونس بيها وبحكاويها...

والوقت معاها يمر جميل

و لا عمرى معاها شعرت بوحشة

و لا عمرى معاها عرفت الويل

ورغم طيبتها وحنيتها...

كانت بتخاف منها الرجاجيل

أصل صفية دى شخصيتها

واعرة وعرق صعيدى أصيل

ولا بتخاف غير م اللى خلقها

وفى حنيتها ما شفت مثيل

وأما كبرنا خدتنا الدنيا...

وأصبحنا دايما مشاغيل...

قل سؤالنا على بعضينا...

وسفرنا صار دربه طويل

يا قلب صفيه إزاى جاك قلب

تمرض قلب أتبنى ع الحب..

قلب ما يعرف غير الطيبة...

قلب ما تطلع منه العيبة...

ع الحب أترعرع ده وشب...

قلب صفية ده أطيب قلب