عبير حلمى تكتب: الناس مش بالمظاهر

حقيقى الناس مش بالمظاهر

إنما بالباطن مش بالواضح أو الظاهر

سيب اللى يقول يقول..

بكره هيعرفوك ولما يعرفوك هيقدروك

هيقولوا ده مكنش باين عليه أبدًا أو ظاهر

جدع وعترة وابن بلد والخفى أكثر من الظاهر

أصل الناس بالعشرة مش بالكلام والمظاهر

فيه اللى هيمدحك

وفيه اللى هيجرحك

وفيه اللى كلامه ممكن يوجعك

سيب اللى يقول يقول..

 بكره ينكشف الباطن اللى جواك لما تطول العشرة معاك

وتبان حقيقتك المستخبية وكلامهم يجى على هواك

ويقولوا فكرناك رخم لكن طلعت عسل ده غير خفة الظل اللى مصحباك

 حقيقى الناس مش بالمظاهر

وعلى رأى المثل

اللى معاشرتهوش متعرفهوش

كلام أجدادنا زمان

كلام كله حكم وأنغام

سيبك من اللى يتكلم عليك..

بكره يندم على اللى قالوه!

لما يعرف طيبة قلبك وحنانك

ويظهر له صدق قولك وكلامك

أصل الناس مش بالمظاهر

لكن بالباطن مش بس الظاهر

إلا لما يكون الباطن اللى فيك

 هو الواضح للناس والظاهر

خلى اللى يقول يقول..

الناس حقيقى مش بالمظاهر