سألنا الستات إيه أكتر كلمة محتاجها من جوزك فى الولادة؟.. نهى: أنه بيحبني.. نورا: مكنتش عاوزة أشوفه بس قالى انتى أحلى أم.. يسرا: قالى هتقومى بالسلامة عشان أنا من غيرك ولا حاجة.. والطب: الاهتمام هو الأساس

عند اقتراب موعد الولادة تشعر المرأة بالخضة من الناحية النفسية وأيضًا الجسمانية، فنجد أن بعضهن يعانين من الاكتئاب وعدم الرغبة فى مشاهدة أنفسهن بالمرآة، والسبب في ذلك "محدش بيقولى كلمة حلوة.. هو أنا بقي شكلي وحش أوي كدة؟"، وبعد أن اخترق "اليوم السابع" الحواجز وقام بسؤال بعض النساء اللاتي خضعن للولادة قالت: "عارف هند صبري لما قالت أنا عوزة ورد يا إبراهيم...هو ده اللي إحنا عوزينه مش ورد طبعًا لكن الاهتمام والكلمة الحلوة".

لازم جوزك يحضر الولادة.. هيقدر تعبك

فقالت نهى رضوان سيدة فى العشرينات: "أنا ولدت ابنى قيصرى.. وأنا دخلة أولد كنت هموت من الخوف والرعب، خاليت جوزي يدخل معايا الولادة عشان يقدر ويعرف قد أيه تعبت عقبال ما أولد.. وفعلاً بعد ما ربنا كتبلي عمر جديد وولدت أول حاجة قالهالي أنه بيحبني أوى.. وكان مرعوب عليا في الولادة.. وأن أهم حاجة كانت عنده أني أقوم بالسلامة".

"على الغم من الألم اللي شوفته بس الكلام ده ريحني جدًا.. وجدد الحب بينا.. وهو اتغير معايًا جدًا بعد ما قدر تعبي في الولادة وبعدها.. عشان كدة أنا بقول لكل ست لازم جوزك يحضر معاكي الولادة".

 

نورا: مكنتش عاوزة أشوف جوزى بس هو احتواني وطمني وقالي هتبقى أحلى أم

"أنين الألم تمزق بطني".. هذا ما قالته نورا أحمد مشيرة إلى يوم الولادة، وقالت "أنا ولدت طبيعي والألم كان صعب جدًا بتاع الطلق.. أنا كنت عند ماما يوم الولادة وتعبت وروحت المستشفى وجوزي جالي علي هناك..أول لما شوفته عيطت وقولتله أبعد عني مش عوزة أشوفك خالص.. وهو بصراحة احتواني جدًا ومسك أيدي وقالي إنه بيحبني جدًا وأني هبقي أحلى وأحن أم.. بصراحة أطمنت ودخل معايا غرفة العمليات بس الدكتور مرضاش يخليه يحضر الولادة.. بس بعد ما طلعت جابلي بلالين ودلعني جدًا.. أنا عوزة أقولوا أنه أحلى حاجة في الدنيا.. وربنا يخليه ليا ولبنتنا".

يسرا: قالى هتقومى بالسلامة عشانى

"حالتي كانت خطيرة لأني عندي جلطة في رجلي.. وأنا دخلة أولد الدكتور قال ربنا يستر ونلحق الأم.. هو كان مرعوب وهيموت من الخوف.. بص في عينيا وقالي إنتي هتقومي بسلامة عشان أنا من غيرك ولا حاجة.. كلمة بسيطة جدًا بس أدتني حافزا قويا وخلاني أقاوم أي ألم والحمد لله عدت على خير وجبنا ابننا وأدينى حامل تاني في بنوتة أدعولى بقى أقوم بالسلامة".

 

رأى طب النساء والتوليد
 

وحول ذلك يشير الدكتور أحمد حسين استشاري النساء والتوليد، إلى أن الولادة تعد من أصعب الألم الذي تشعر به النساء، فالطلق شبية بتكسير عظام الجسم، فلك أن تتخيل عدد الطلقات الاتي تتعرض لها السيدات.

وأضاف استشاري النساء والتوليد، أن دور الزوج يكون صعبًا للغاية لأنه يجب أن يشعر زوجته بالطمأنينة وراحة البال، عن طريق التعبير لها عن حبه، وعلى أنها أهم عنده من مجيء الطفل، فهذا يشعرها بالراحة ويعطيها المزيد من الطاقة الإجابية العالية التي تساعدها في الولادة خاصة إذا كانت ولادة طبيعية.

الطب النفسي يرى أن الاهتمام هو الأساس

أما الرأى النفسي في هذا الموضوع، يوضحه لنا الدكتور محمد علي أخصائي الطب النفسي، مؤكدًا أن الكلمات التعبيرية هى أهم الأشياء التي تحتاجها الزوجة أثناء الولادة، وليس من زوجها فقط بل من والدتها وأخوها ووالدتها وأختها، وكل المحاطين بها.

وأضاف أخصائي الطب النفسي، أن الاهتمام ثم الاهتمام هو الأساس في معاملة المرأة التي تخضع للولادة، ثم التعبير لها عن حب المحاطين بها خاصة زوجها من أهم الحيل التي تشعرها بالراحة النفسية، ودعم قرارتها في اختيار نوع الولادة، فهذا يجعلها تشعر بالراحة النفسية.