محمد عبودة يكتب: محاسن الصدف

الصدف فى حياتنا ليها تأثير كبير، فى ناس شغالة بالصدفة، وفى ناس نشوفهم بعد سنين غياب صدفة ونحس أنها صدفة مرتبة من ربنا، أننا نشوفهم من غير سبب، نتأكد أن الصدفة دى مش صدفة والسلام لما نشوف الايام بعدها بتمشى إزاى .

إلى  حد ما أوقات بتكون الصدفة سخيفة ورخمة  بس أوقات بتكون حلوة اوى، وتصحى جوانا احساس كان اختفى من سنين،  وافتكرناه راح ومات   بس لما العين تيجى فى العين صدفه ويصحى شىء نايم من سنين جوانا نتأكد انه مماتش.

وممكن تقابل صديق او قريب ليك فات سنين على آخر مرة شوفتوا بعض واتكلمتوا سوا  وبحس انك بتحكيله على كل تفاصيل حياتك باهتمام، وهو  كمان يسمعك باهتمام، وعنده هو كمان كتير عشان يقولك عليه  وتبقى الصدفه دى هى بداية لعلاقة قوية  تستمر لبعد كده .

انا شخصيا بحب الصدفة الجميله جداً  وبحسبها ترتيب الاقدار مش جاية والسلام ..بس أهم حاجة فى الصدف إنها لو كانت صدفة وعدت  بلاش نخليها تأثر على حياتنا الطبيعية أو تخلينا نعيد التفكير فيها  لأنها ممكن تكون حصلت عشان تنور سبوت على حاجة معينة فى حياتنا  مش واخدين بالنا منها  محتاجه تتعدل او تتغير  اصلا، او نهتم بيها زياده بدل الاهمال

بس انا بعتبر الصدفه زى (ريفريش) لحياتنا.