القارئ محمود السيد يكتب: الخناقة

اللحمة قالت للفول

إتلم يا مدمس

شايفاك كده على طول

فرحان ومتحمس

على إيه عايش لى الدور

يا أبو طينة ومسوس

الفول قوام قال لها

بسوس وليا الفخر

أكل الغلابة أنا

شاهد عليا الدهر

مشهور ويكفينى

بين البشر سمعة

بطحينة تلاقينى

أو حتى بالدمعة

يعرفنى جيل ورا جيل

م الروضة للجامعة

أما انتى يا معفنة

للشهرة محدودة

على خشبة الجزار

أهى سلعة معروضة

غالية صحيح التمن

هيجور عليكى الزمن

ما هتبقى موجودة

اللحمة قالت ههءء

ده قصر ديل يا ازعر

إشهد وقول الحق

على إيه هتتكبر

دا انا يابنى من صغرى

وانا أكلة البشوات

ولا يعمل البوفتيك

غير لحمى أنا بالذات

والفتة من غيرى

تشبع صوات وعياط

ولا حد منى يمل

ولا حد غيرى يحل

فى الكوسة بالبشاميل

والكبسة مالهاش حل

باللحمة والبهارات

إصحى وفوق يا خفيف

يا أبو نفس أمارة

آخرك يا حلو رغيف

ويغمسوه بصارة

ف بعظمة الأبطال

قام حط رجل ف رجل

وبعلو صوت أم قال

شوفى يا حتة عجل ...

سيبيكى م الفشخرة

وكفاية هرى كتير

يا واخدة ع المنظرة

والكدب والتبرير

دا انتى يا موكوسة

خلطوكى لحم حمير

فاكرة جنون البقر

من كام سنة فاتوا ؟!

واللى اتأذوا م البشر

ومن المرض ماتوا ؟

أقول كمان وافضحك

ولا تلمى الدور ؟

انا كان ضميرى انصحك

مش قصدى ألف ودور

هاتلمى نفسك بقا

ولا اكشف المستوووور ؟

ضحكت له ضحكة خوف

وقالت له ما تفكك

إعمل يا فول معروف

دا أنا برضوا زى أختك

وكلامى كله هزار

صدقنى وبانغشك

دخل الشيطان وسطنا

والمشكلة كبرت

أنت الكبير إنما ...

أنا عيلة وغلطت