القارئة علياء باز تكتب: "ما أنا أصلى مش معصوم"

ما أنا أصلى مش معصوم

ولا يوم هقول مظلوم

أنا مين و فين وليه

أنا أصلا كنت إيه

أنا قلبى ليه زعلان

مع إنى مش غلطان

أنا هايم بين طريق

والله كان برئ

و مابين كام باب و باب

مش ذنبى كان سراب

طيب مين يقول يا ظروف

و مين ناكر المعروف

وازاى ده كله فات

ياريت كان قلبى مات

و ليه باهتة البيوت

و شوارع ريحتها موت

و زمن حالف بالله

ما نشوف غير الآه

هو احنا مش فاهمين

ان احنا غلطانين

ولا هو أى كلام

أهى عيشة والسلام

طيب إيه .. هتفضل كده ؟؟!

خايف .. حزين ..مكسور ..موهوم !!!؟

لا والله رب الكون

فيه لسه مائة ألف لون

قوم افتح الشباك

ماتبص هنا و هناك

دوس على كل الجراح

أهى سلم للنجاح

ماهو مش من غير سبب

دى دنيا فيها العجب

اتشعبط فى الأحلام

و اصبر على الأيام

صبرك ده كله خير

أيوه انت لسه كبير

لو حتى الظهر اتقسم

فيه مائة مليون عشم

ومائة ألف ايد و ايد

بعزيمة من حديد

جاية السنين قدام

مليانة بالأحلام

وأهو كله بالأسباب

ربك عنده الكتاب

يبقى اجرى باطمئنان

والله فى الأمان