إسدال الستار على مسرح مصر بعد 7 سنين عرض.. النجوم يودعون تجربة أشرف عبد الباقى بكلمات مؤثرة.. عبد الباقى: إلى اللقاء فى أعمال قريبة.. خاطر: حزن شديد بحنين غريب.. أنور: أحلى سنين فى حياتى.. والجمهور: "هتوحشونا"

بعد 7 سنين من عرضه اسدل الستار على "مسرح مصر"، وقدم أشرف عبد الباقى من خلاله مجموعة كبيرة ‏من ‏الفنانين الجدد، الذين أصبحوا نجوما الآن، وحرص نجوم مسرح مصر توديعه بكلمات حزينة و مؤثرة، موجهين الشكر لقائدهم أشرف عبد الباقى على وقوفه بجانبهم طوال 7 سنوات، كما عبر الجمهور عن حزنهم الشديد لختام مسرح مصر.

فى البداية قال النجم أشرف عبد الباقى، "بنشكر جمهورنا الجميل اللى وقف معانا على مدار 7 سنين وانبسط معانا فى 130 مسرحية، بشكر شباب مسرح مصر اللي بقوا نجوم واحترامهم وتفضيلهم للمسرح بنشكر كل واحد داخل وخارج الكواليس وتعب معانا عشان نوصل للى إحنا فيه بنحبكم إلى اللقاء فى أعمال قريبة إن شاء الله ختام مسرح مصر".

وكتب الفنان مصطفى خاطر، قائلا:" والله العظيم أنا مش عارف أقول إيه المشاعر جوايا كتيرة قوى فرحه كبيرة بالنجاح وحزن شديد بحنين غريب أنا مش عارف بقول إيه المشاعر اللى جوايا مش لاقيلها كلام اكتبه بس بشكر الجمهور اللي وقف في ظهرنا على مدار 7 سنين.. بشكر الاستاذ أشرف عبد الباقي اللي وثق فينا وادنا فرصة كبيرة زي دى وعلمنا كتير قوى وصبر علينا واحتوانا كأب وأخ كبير بشكر كل القائمين علي المشروع من أصغر عامل لأكبر حد ساهم معانا فى التجربة.. بشكر عم حسن نجيب مدير الفرقة الخبرة الكبيرة والحب اللى زرعه فينا بشكر الاستاذ نادر صلاح الدين المخرج والمؤلف للمشروع وصاحب مجهود كبير وخبرة كبيرة ادها لنا وأخيرا بشكر كل زمايلي الممثلين في الفرقة وبقولكم أنا بحبكم جدا جدا ونعم الإخوات والصحاب وإن شاء الله دايما فى ظهر بعض".

وقال الفنان محمد عبد الرحمن "توتا"،" مشروع كبير استمر 7 سنين من الشغل والتعب والضحك وتفاصيل كتير تانيه كنا بنعيشها بحب بس خلاص لكل شىء نهاية بس بتبقى بداية جديدة.. وإن شاء الله هنكمل المشوار مع بعض يا أحلى جمهور".

كما وجه الشكر لأشرف عبد الباقى، قائلا: "وبجد بشكر أستاذ أشرف عبد الباقي على الفرصة اللي ادهالنا وصبره علينا وتشجيعه لينا من كل قلبي وبشكر كل الناس اللى ساهمت فى المشروع العظيم ده ويارب تبقى بداية جديدة حلوة وفيها برضه مشاريع عظيمة تعجبكم شكراً ليكم يا أعظم جمهور".

أما الفنان محمد أنور، كتب قائلا:"مسرح مصر اللى استمر علي مدار سبع سنين وقدمنا فيهم 130 مسرحية شكرا استاذ أشرف عبد الباقى على إصرارك من بداية المشروع أنك ترجع المسرح تانى رغم إن ناس كتير كانت ضدك وتحمسك أن يكون معاك فى مشروعك ده وجوه جديدة وفضلت واقف جنبنا طول السبع سنين وفرحان بنجاحنا لحد ما الفرقة كلها دلوقتى بقت نجوم ومعروفين فى كل الوطن العربى وشكرا لكل زمايلى واخواتى فى الفرقة على أحلى سبع سنين فى حياتي.. أنا بحبكم جدا واتعملت منكم كتير جدا ويارب نفضل سوا جنب بعض كدة طول العمر وشكرا لكل جمهور مسرح مصر فى مصر وكل الوطن العربى على وقوفكم جنبنا وتشجيعكم لينا من البداية ولحد دلوقتي ونوعدكم بحاجات أحلى".

وكتب الفنان حمدى الميرغنى، قائلا:" شكراً من قلبى لأخويا الكبير وأستاذى أشرف عبدالباقى على 7 سنين أديتنا فيها الثقة والخبرة والنجاح شكراً علي 7 سنين كنت فيهم أخونا وصاحبنا الجدع شكراً أصحابى وأخواتي ممثلين وفنيين وعمال فرقة مسرح مصر علي أجمل 7 سنين في حياتي قضيتها معاكم شكراً لأجمل جمهور فى الدنيا على ثقتكم فينا ووقوفكم جنبنا وحبكم لينا دعواتكم معانا فى اللي جاى".

وقالت الفنانة ويزو، " شكرا يارب على النجاح الكبير لمسرح مصر شكرا استاذ أشرف عبد الباقى على كل حاجة حلوة قدمتها لنا وساعدتنا فيها وبفضل ربنا ثم فضل وقوفك معانا وصلنا للنجاح الكبير دا أنا بحبك جدا وفخورة إنى كنت شغالة معاك فى المشروع العظيم دا شكرا لكل إخواتى واخواتى مش عارفه اقول أصحابي علشان انتو أكتر من إخواتى عشرة كبيرة بينا فرح وحزن وضحك وهزار وشغل ربنا يخليكو ليا".

بينما قال الفنان كريم عفيفى:" شكرا لكل الناس اللى كانت معانا وفى ضهرنا أنتم أعظم جمهور فى الدنيا وإلى اللقاء قريب فى حاجات أحلى وأجمل".

فيما عبر الفنان محمد أسامة " أوس أوس"، عن حزنه لانتهاء مسرح مصر، قائلا: شكرا جمهور مسرح مصر.. شكرا استاذ أشرف عبد الباقى .. هتوحشونا".

وكتب الفنان حامد الشراب، قائلا:" شكرا استاذ أشرف عبد الباقى على كل حاجة عملتها معانا من أول بدايات المشروع لحد ما وصلنا لـ130 مسرحية كنا عيلة كبييرة مش مجرد فرقة مسرحية طول الـ 7 سنيين كنت أخ كبير لينا كلنا شكرا على مدرسة مسرح مصر شكرا لكل إخواتى اللى وقفت جنبهم على المسرح اتعلمت منكم كتير جدا ويا رب ميحرمنا من لمتنا سوا شكرا لكل كرو الإخراج كرو الديكور شكرا لكل واحد كان فى الكواليس علشان نقدر نطلع 130 مسرحية"، وقال الفنان إبرام سمير،"  شكرا يا أحلى جمهور فى الكون عيشنا معاكم وعيشتونا فى أحلى حلم".