طبيبة صباحا ومطربة وموديل محجبات ليلا.. قصة ميرنا عبد الوهاب

ميرنا عبد الوهاب

كتب بهاء نبيل

الجمعة، 01 فبراير 2019 03:29 م

نادرا ما يجمع الشخص بين العمل فى مجالين بعيدين عن بعضهما ومختلفين، ولكن ميرنا عبد الوهاب جمعت بين أكثر من وظيفة فهى تعمل طبيبة تحاليل بشركة دواء صباحا، ومطربة فى الأوبرا وموديل للمحجبات وفاشون بلوجر ليلا، وليس ذلك بحثا عن الشهرة فالغناء بالنسبة لها موهبة وحلم الطفولة الذى راودها كثيرا ولم تتغاضى عنه رغم التحاقها بكلية العلوم وعملها فى تخصص الكيمياء، ومن خلال هذا الحوار أرادنا أن نعرف كيف جمعت بين كل هذه المجالات.

متى اكتشفتى موهبة الغناء والى أين وصلتى فى هذا المجال؟

فى الثانوية العامة كنت بغنى فى المدرسة، ولما والدى قال إن مش هينفع المذاكرة مع الغناء، حاولت أرضيه ودخلت كلية العلوم وبعد ما خلصت الدراسة روحت قدمت فى أوبرا دمنهور وعملت اختبارات والمايسترو عجبه صوتى وبدأت معاه تدريبات وفى نفس الوقت كنت عملت فى شغلى بشركة الأدوية، وبنفس الوقت أعمل كمطربة لحبى للمزيكا والعزف والغناء وهى بالنسبة لى هواية ولم أكن أعرف أنى سأغنى على مسرح الأوبرا.

من هم المطربين المفضلين بالنسبة لك ونوعية الأغانى التى تحبينها؟

أنا بحب المطربة أنغام جدا وساعات بحس إنى بعرف أغنى قريب منها شوية، وبحب أيضا شيرين عبد الوهاب، أما بالنسبة للقديم بحب فيروز وصباح ولما غنيت فى 3 حفلات غنيت لشادية ووردة.

هل فكرتى فى التقديم بأى برامج اكتشاف المواهب حتى تظهرين نفسك على الساحة؟

كل الناس قالتلى إنى المفروض أقدم بعد تجربة نداء شرارة لأنها كانت محجبة وحصلت اللقب كمان، لكن أنا بالنسبالى معنديش وقت، بجانب أنى مش عاوزة الغناء يكون بالنسبة ليا مهنة لأنه هواية فقط أحب أمارسها.

هل ستتخلى عن حجابك أو القيم والمبادئ التى تربيتى عليها مقابل الشهرة ؟

الحجاب لم يعطلنى عن نجاحى فى أى مجال عملت فيه، ولو الحجاب هيكون عائق بالنسبة ليا أو يعطلنى شوية أنا معنديش مشكلة إنى أصبر شوية لكن مش هتخلى عن الحجاب أبدا.

من الصعب أن يجمع الإنسان بين عملين ولكنك تجمعين بين الطب والغناء والموديلز، كيف توازنين بينهم؟

أنا منظمة الوقت، وقت شغلى فى شركة الأدوية له وقته، أما شغل الموديل بيكون يوم الجمعة اللى هى إجازتى وبحاول أضغط وقتى، وبالنسبة لعملى بالسوشيال ميديا مش بتاخد وقت منى لأنه بيكون ليلا بعد ما بخلص شغلى وبسجل فيديوهات وأنا فى البيت.

ماهو الهدف الذى تسعى إليه من خلال عملك بأكثر من مهنة رغم الاختلاف بينهم؟

الفكرة إنى بعمل الحاجات اللى بحبها، ومش بحس إنى مرهقة أو تعبانة فيها ولما جربت اشتغل فيهم كلهم لقيت الناس حابة شغلى وقدرت أنجح فيهم كلهم فقررت أكمل فيه عادى، ولو حاجة مش بحبها أكيد هسيبها على طول.

هل واجهتى صعوبات مع أهلك فى إقناعهم بمهنة الغناء أو الموديلز؟

لم أواجه صعوبة مع أهلى وعارفين كل حاجة عنى ومقدرين إن الشهرة بيكون فيها انتشار لصورى، ولكن أهلى عندهم ثقافة أنهم فاهمين انه شغل زى أى شغل تانى ولما بروح أعمل جلسة تصوير ومحتاجة حد يبقى معايا، بيرحبوا جدا بالموضوع وبيرافقنى والدى ووالدتى عادى.

أخيرا بعد كل هذه المهن أين حياتك الشخصية؟

ساعات بخرج مع أصحابى وبنسافر، لكن مش بشكل كبير بسبب ارتباطى بشغلى، ولكن لما بيكون فى فرصة بخرج عادى، أما بالنسبة للارتباط الموضوع مش مطروح فى الخطة حاليا لأن لسه محصلش نصيب، ولما يحصل نصيب هاظبط وقتى وممكن أقلل شغلى فى الموديل شوية لأنى فى الأول والآخر هارتبط بحد يكون فاهمنى، أما عملى فى شركة الأدوية ده أساس حياتى مش هينفع أسيبه.