التطور المش طبيعي للجواز

من خبرتي في الحياة وعلاقاتي الاجتماعية الكبيرة جدا بقيت متأكدة إن علي الرغم من صعوبة العلاقات في الشغل والصحاب وحتي العائلة ، لكن العلاقة بين الرجل و المرأة من أصعب و أعقد العلاقات ده إذا ما كانتش الأصعب علي الاطلاق.

بس ده مش معناه إن علاقات الحب والجواز كلها زي بعض لكن لكل منها صعوبة تختلف عن التانية وده علي حسب طبيعتها.

يعني مثلا عندك:

العلاقة الكلاسيكية اللي اتربي عليها معظمنا و شفناها في الأفلام القديمة. الست اللي بتحافظ علي بيتها مهما كانت الصعاب و الظروف. هدفها الأوحد هو بيتها وأولادها. مهما حصل الطلاق مش وارد.

الشكل ده طبعاً اتغير مع الوقت زي أي حاجة في حياتنا،

مع التطور علاقتنا اتغيرت.

الست أصبحت تقدرتنفصل لو مش سعيدة  لأنها  مستقلة مادياً، مفيش احتياج لراجل يصرف عليها لأنها بتشتغل و تقدر تصرف علي نفسها، وفِي أوقات كتير في ستات بتفضل في علاقات فاشلة و تعيسة فقط من أجل الحاجة المادية و أهلها كمان مايقدروش يعيلوها.

و في ناس بتتجوز علشان المصالح. الحب مش الأساس. المستوي و الشكل الاجتماعي هما الأساس. و النوع ده في معظم الأحيان مش بيعمر.

و في كمان اللي حتتجوز أي حد مش لازم  الراجل الصح ولا الحب ولا التفاهم. المهم تتجوز و خلاص، علي رأي المثل ضل راجل ولا ضل حيطة.

وفى اللي مستخسره حالها في أي حد و شايفة نفسها علي الآخر. حتي و هي متجوزة مش مكتفية وعايزة حد احسن. النوع ده في معظم الأحيان بيخسر كل حاجة و بيحرق نفسه علشان مافيش رضا.

علشان كده نلاحظ إن في مصر في السنين الأخيرة الطلاق في  حالة ازدياد مرعب. و يقال أن معدل الطلاق عندنا هو الاعلي في البلاد العربية، وفِي رأيي الشخصي ده بيرجع للخوف من الالتزام. ماحدش عايز يتحمل المسؤولية و يحاول ينجح العلاقة. الأسهل أنه ينسحب. إيقاع الحياة بقي سريع جداً و كله عايز التغير و غير مكتفي بالي عنده، فاكر ديماً انه حايلاقي شريك لحياته احسن و شايف نفسه خسارة في أي حد!!! و طبعاً في "أولاد حلال" هوايتهم أنهم يخربوا البيت و يطلعوا هما الكسبانين.