دكتورة فى الطبخ.."أريج" بتخرج من المستشفى تطبخ وتقدم معلومة طبية مع كل أكلة

المطبخ عشق خاص لا يفهمه إلا قليلين، وحب الطبخ وابتكاروصفات جديدة شغف لدى بعض الفتيات اللاتى يفضلن الوقوف فى المطبخ لساعات طويلة من أجل إعداد كل ما لذ وطاب للأسرة، وهذا يدخل على قلوبهن الشعور بالسعادة وعدم الاحساس بالتعب، فالوقوف فى المطبخ شغف لن يفهمه الكثيرين.

"أنا خريجة دفعة 2014 كلية طب القصر العينى، تخصص جهاز هضمى وكبد ومسجلة ضمن برنامج الزمالة المصرية للتدريب، لكن بعشق الطبخ والوقوف فى المطبخ وتقديم الأكل بشكل حلو يجذب العين، وعمر ما الدراسة أو الطب الشغل خدوا وقتى من حبى للمطبخ" هكذا تحدثت الدكتورة أريج محمود عبد العزيز عن عشقها للطبخ.

عام واحد فقط مر على اتخاذها لقرار تجربة وصفات طعام جديدة، ومنذ المرة الأولى اكتشفت أن كل الوصفات التى قامت بتنفيذها كانت جيدة بل ومميزة بشكل ملحوظ، وهذا ما أكده كل من تذوقها، وأضافت: "عجبنى الموضوع جدا وبقيت بطور من نفسى، غير إني بحب التصوير كهواية وده ساعدنى في تصوير الأطباق اللى بعملها بشكل حلو، ولما بنزل الصورلأصحابي على السوشيال ميديا بلاقى اعجاب كبير وكله عاوز يدوق من شكل الأكل".

 

وعن مقولة "العين بتأكل قبل الفم" قالت الدكتورة أريج: "مقتنعة تماماً إن الاكل نفس حلو وممكن نفس الوصفة يعملها 100 واحد وتعجبك من 50 بس والباقى يطلع وحش، والعين بتأكل قبل الفم عشان كده بهتم وبحب تقديم الأطباق بشكل مرتب وجميل، والطبخ عامة لو مكنش بحب عمر ما طعم الأكل هيبقى حلو، بدليل إن كلنا بنعشق أكل أمهاتنا لأن طول سنين عمرنا الأكل ده معمول بمنتهى الحب والعطاء والاهتمام بكل تفصيله".

 

وبسؤالها عن كيفية التنسيق بين الطبخ والشغل، قالت: "أنا مكملة فى تحضير الزمالة المصرية وبنزل شغلى والنبطشيات فى المستشفى، وفى نفس الوقت بعد ما بخلص بدخل المطبخ وابتكر وصفات ومبحسش بوجع وأنا بطبخ لأن بحب اللى بعمله وأوقات كتير باخد اللى الأكل اللى عاملته لأصحابى فى المستشفى".

وتختتم "أريج" حديثها عن هوايتها للطبخ قائلة: "حلمى فى يوم من الأيام يكون عندى محل، لكن بدأت بحاجة صغيرة فى الأول وبشارك بصورالأكل على صفحتى على فيس بوك وكل صورة عليها الوصفة ومعلومة طبية عن فوائد الأكلة لأجهزة الجسم، وبنصح اللى عندهم سكر وضغط يبعدوا عن أكلات معينة، وكل ما بشوف ردود الفعل الايجابية على صور الأكل ده بيسعدنى وبيشجعنى أكتر".