الرئيس السيسي بـ"مؤتمر الشباب": لو الشعب رفض الإصلاح الاقتصادى كنت هعمل انتخابات مبكرة.. ويؤكد: ما أنجزته الدولة المصرية عظيم جداً بالنسبة للحالة التى كنا عليها.. والمؤتمر فرصة ليعرف الشعب "إحنا ماشيين إزاى"

ناقش الرئيس عبد الفتاح السيسى، أسباب نجاح البرنامج الاقتصادى المصرى، والتحديات التى واجهت تنفيذه، خلال كلمته، بجلسة "نموذج محاكاة الدولة المصرية"، ضمن المؤتمر الوطنى السابع للشباب، بالعاصمة الإدارية الجديدة.

"ما أنجزته الدولة المصرية عظيم جداً بالنسبة للحالة التى كنا عليها"

قال الرئيس عبد الفتاح السيسى، إن تحمل الشعب المصرى برنامج الإصلاح الاقتصادى شرف له، معرباً عن عرفانه للشعب المصرى لرد فعله على برنامج الإصلاح الاقتصادى.

وأضاف: "اتكلمتوا عن سيناء كتير، وزميلنا فى وزارة الإسكان فى حكومة المحاكاة بيقول القانون 14 لعدم ملكية الأجانب فى سيناء، يا سيادة الوزير القانون دا أنا حطيته وأنا وزير الدفاع عشان أحمى الأرض فى سيناء يا دكتور".

وتابع:"فرصة أتحدث معاكم عشان تعرفوا إن اللى أنجزته الدولة المصرية، والله العظيم أنا بحلف بالله، أنا لا ببالغ ولا بجامل ولا حاجة، رائع وعظيم جداً بالنسبة للحالة اللى احنا كنا فيها، حصل ترهل لحالنا فى القطاع الحكومى والأداء خلال سنين طويلة فاتت حصل تعاظم لمشاكلنا فى كل القطاعات، وكل قطاع ندخله ألاقى الدنيا صعبة".

واستطرد :"طول ما انتو ماشيين تلاقوا المبانى كلها طوب أحمر، هو فيه دولة كده، كلها طوب أحمر، يادوبك بس اللى الحكومة بتبنيه والمطورين العقاريين، هو اللى كويس، والباقى كله كده، يبدو إن احنا رضينا بالقُبح، ونسينا الحُسن، دا بيعكس الدولة راحت لفين".

وأكد الرئيس السيسى أنه لم يتم البدء فى الإجراءات الاقتصادية فى ظل ظروف عادية، موضحاً أن الشعب المصرى كان ثائراً.

وأردف:"عجبنى الطرح بتاع رأس التين، وأنا بقول لشباب المحاكاة إن مشروع زى دا لازم نحطه فى الاعتبار، واحنا بنتكلم فى استثمارات بـ 200 مليار جنيه، رقم كبير وأتصور أنه هيغير كتير فى الجزء ده من الإسكندرية، ما تقوموا انتوا بتسويق الموضوع كرجال الأعمال مش  الدولة".

تحمل الشعب المصرى برنامج الاصلاح الاقتصادى شرف لى

وقال الرئيس عبد الفتاح السيسى، إن تحمل الشعب المصرى، برنامج الاصلاح الاقتصادى شرف لى، معربا عن عرفانه للشعب المصرى لرد فعله على برنامج الإصلاح الاقتصادى.

وأضاف، أن ما لا يقل عن 5 ملاييين شخص يعملون فى المشروعات القومية،  وكان لابد من إعادة الأمل للشعب فى غد أفضل، وكنا على ثقة فى وعى المصريين وإرادة التغيير لديهم.

وتابع الرئيس السيسى: وزيرة التضامن كانت لديها خطة للإصلاح الاقتصادى للدولة تنفذ خلال عامين أو ثلاثة، ولكن أصرت على تقليص المدة إلى عام واحد فقط.. وهناك ملايين من الأسر المصرية تستهدفها الدولة بمبلغ مالى عشان نطبطب على أهلنا".

لو الشعب رفض الإصلاح الاقتصادى كنت هاعمل انتخابات مبكرة

وقال الرئيس إن الحكومة عندما تحدثت عن اتخاذ قرارات الإصلاح الاقتصادي، كان لابد وأن نوضح هل تمت التجربة  فى ظروف طبيعية عادية أم  ظروف صعبة، مضيفا :"وإحنا بنعمل الإجراءات ، حرصنا أن يكون تصورنا هو إيجاد حل قوى جدا وجريء جدا للمشاكل الاقتصادية ،فى ظل تعرض الدولة  لثورتين خلال 3 سنوات".

وتابع، أن نقطة الانطلاق للإصلاح أن نحافظ على الدولة وننهض بها ، وتحدثت فى ذلك الموضوع كثيراً، مضيفا:" عايز أفكركم أننا بدأنا الحل فى ظل طروف صعبة من التحديات السياسة والاقتصادية والأمنية والثقافية والدينية، وإحدى التوصيات بتدعو الأوقاف مع الأزهر مع البرلمان لأن يسنوا تشريعات بخصوص موضوع الزيادة السكانية أو معدل المواليد".

وأكمل الرئيس السيسي، قائلا:"بدأنا الموضوع فى مصر ، وبنقول إننا الآن بعد خمس سنين بفضل الله وبفضل الشعب، أصبحت مصر فى موقف ووضع تانى أفضل، ولو اتكلمت على البنية الأساسية وتناول حكومة المحاكاة للبيانات، سنتكلم على كام كيلو من الطرق تم إنجازها ؟  الحكومة الحقيقية  لازم توضح امعنى الأرقام التى تم إنجازها فى هذا المجال  أحنا عملنا 8000 كيلو طرق من 3 لـ6 حارة فى كل اتجاه، ولو قلنا إن المتوسط يساوى 40 ألف كيلو ، فهذا يعنى أن تكلفة بنية الطرق فى مصرتساوى 160 مليار جنيه ".

وتابع: بالنسبة لقطاع الكهرباء ، كنا في وضع معندناش طاقة كافية ، ودلوقتى عندنا احتياطى زيادة فوق الـ20% ممكن يروح لدول الجوارعن طريق  الربط الكهربائى مع السودان أو ليبيا أو قبرص أو السعودية، وما تنسوش أحنا كنا فين ، إحنا كنا فى وضع تانى ، كنا دولة على وشك الانهيار والضياع والشعب كان فاقد الثقة فى كل شيء، وكان يجب علينا إعادة بناء الثقة فى قدرتنا على  تحقيق غد أفضل".

واستطرد خلال حديثه "الخطة اللى اتعملت، وبالمناسبة كل الزملاء أثناء نوفمبر 2016 كانوا متحسبين من رد الفعل والكل فى التصويت كان خايف أيوة كان خايف، وإحنا بنخاف على بلدنا لو حصل حاجة لا قدر الله تنهار وتدمر، والكل كان متحسب ، لكن أنا هنا مش بذكى نفسى وقلت لا، قلت الحكومة تجهز لو الشعب رفض الإصلاحات تقدم استقالتها الخميس، ولو الشعب رفض يوم السبت هعمل انتخابات رئاسية مبكرة وأسلم البلد لحد تاني ، ما هو يا نبنى بلد مظبوط ونحل مشاكلنا يا نسيبها ونمشى لحد تانى يقدر".

وأكد الرئيس عبد الفتاح السيسى، أن العاصمة الإدارية الجديدة ساهمت فى توفير فرص العمل، قائلاً: "العاصمة الإدارية مش هتقوم لوحدها، وتتطلب تشغيل، وناس تبنى وتعمر.. والناس التى ستسكن جزء من الموضوع، وفى الآخر المواطن البسيط اللى عاوز 100 أو 150 جنيه كل يوم يرجع بيهم لبيته، وعلينا أن نكون فاهمين أن الشعب واعى جيدًا، ويتطلع لقوت يومه ولو عرفنا نوفر ذلك ونرفع من دخلهم يبقى نجحنا فى مهمتنا".

وأضاف الرئيس،: "أقدّر كل الجهود وأعتبر أن المؤتمر فرصة لنلتقى ونتحدث مع بعضنا البعض ويرى الشعب المصرى ويعرف إحنا ماشيين إزاى وبنتكلم مع بعض إزاى.. هل نتحدث بانفعال وحدة وعنف واتهامات، أم بشكل يليق بمصر وتقدمها؟".

وتابع: "إحنا بنتكلم فى 14 مدينة سنفتتحها، أولها أسوان الجديدة ثم غرب قنا ثم أسيوط الجديدة ثم الفشن، ثم مدن بالدلتا والمنصورة الجديدة وشرق بورسعيد والعلمين.. يعنى الواحد يكون فى المنصورة ويصيف فى الإسكندرية؟؟ ولا يطلع على المدينة الجديدة بالمنصورة؟".