رسائل محمد رمضان لإبليس وإخوانه فى "هما عايزينها فوضى".. الأسطورة يصف المقاول الهارب بالخسيس.. ويؤكد: "الراجل لو ليه حق مش هيسيبه".. ومصر بالنسبة لنا وطن وبالنسبة للخونة مستعمرة.. ولن نعود خطوة واحدة للخلف

فى رسالة للتعبير عن وقوفه بجانب مصر ودعمه لمؤسسات الدولة ضد محاولات استهدافها من جانب بعض الخونة، وجه النجم محمد رمضان رسائل للمقاول الهارب محمد على، فى أغنيته الجديدة "هما عايزينها فوضى"، موجها له العديد من الرسائل .

"انت مش راجل"، "بعد ما هربت جاى تعمل مناضل ومشروع حياتك الوحيد فاشل"، كانت هذه هى أهم الرسائل التى وجهها محمد رمضان فى أغنيته، كما نصحه بعدم التحدث باسم الشعب المصرى فهو لا يدري أى شئ عن مشاكله أو حياته وسعيه للرزق الحلال، قائلا :" تعرف ايه عن الغلبان اللي بيعرق لأجل الجنيه".

وفى جزء آخر من الأغنية التى حققت ملايين المشاهدات فى أقل من 24 ساعة من طرحها، أكد رمضان أن الشعب المصرى لن يسمح بالعودة للخلف ولو لخطوة واحدة حتى لا يحقق منافع "لأبليس والخونة" فى إشارة للأذرع الإعلامية الإخوانية التى تبث الشائعات وتريد إشعال نار الفتنة بالشارع المصرى، مشيرا إلى أن مثل هذه الحملات الفاشلة مرت من قبل ولن نتأثر بها.

وتدور أحداث كليب "هما عايزينها فوضى"، حول الأوضاع فى مصر حالياً، والتى أعلن من خلاله الفنان محمد رمضان دعمه للدولة المصرية ووقوفه إلى جانب مؤسسات الدولة ضد محاولات استهدافها.

كلمات أغنية  "هما عايزينها فوضى " :

ولا أنت مش راجل

بعد ما هربت بعيد جاي تعمل فيها مناضل بالباطل

ازاي عايز تخطط لمستقبل شعب كامل

لو مشروع حياتك الوحيد اللي انت عملته فاشل

تعرف ايه انت عن الشارع و اللي بيحصل فيه

تعرف ايه عن الطفل اللي من صغره بيصرف عالبيت

تعرف ايه عن الغلبان اللي بيعرق لأجل الجنيه

اكيد مسمعتش صوت الشعب و انت جوه الكباريه

تعرف ايه عن الاصول و حق الملح و العيش

تعرف ايه عن الامان اللي سببه الشرطه و الجيش

اللي مالوش كبير بيشتري ده اللي اتربينا عليه

و ده بينفي انتماء الشارع اللي بتدعيه

طب افترضنا ان كلامك ده بجد

لما نعض في بعض ازاي ده هجيبلك حق

استنى انت بتقول انك مقاول

فطبيعي مش هتلاقي فرصه شغل غير لما الدنيا تتهد

البينه على من ادعي

لو اتفرقنا مين وراك هيبقى ليه منفعه

ابليس و اخوانه عايزينها مولعه

 

مصر جنه بيهابوها عشان اهلها متجمعه ..

هما عايزينها فوضى فوضى فوضى فوضى

مهما هيعلوا صوتهم لسه صوت الحق اوضح

عدى علينا كتير منكم على مر الازمان

احنا مقبره غزاه انتوا مجرد هواه

الخسيس الجبان ملوش وسطنا مكان

هنفكركم لو نسيتوا بلد الامن و الامان

اللي اتذكرت في القرأن و بتعلى كل يوم بولادها

اللي منهم عالحدود و اللي بيذاكر المنهج

الفلاح و الصنايعي و الظابط و الام في بيتها

مش اللي قرر انه يبيعها و يهرب منها بعيد و يسيبها

الراجل اللي بجد لو ليه حق مش هيسيبه

لو هرب اخر الدنيا لازم يرجع ويجيبه

عذرا على التشبيه بالنسبالنا التخريف

زي اي فيديو ليك مفيش عاقل عايز يعيده

هما عايزينها متدمره

بالنسبالنا وطن بالنسبالهم مستعمره

بالعدل و السلام هنتحرك لقدام

مستحيل نرجع خطوه تاني ورا

هما عايزينها فوضى فوضى فوضى فوضى

مهما هيعلوا صوتهم لسه صوت الحق أوضح

وكان الفنان محمد رمضان قد نشر مقطع فيديو منذ أيام قال فيه أن هناك جماعات وشخصيات هاربة خارج الدولة وتوجد فى دول أخرى مثل قطر وتركيا يحولون إثارة الأوضاع داخل البلاد بعد أن حصلوا على خيرها، متابعا: "مش عاوزين نشمت حد فينا.. وأنا غيران على بلدى.. والناس الهربانة بيحولوا يقوموا الدنيا.. وأنا غيران لأنى مش عاوز نتحرك زى العرائس الماريونت.. واللى بيحرضوا على التظاهر مش بياكلوا من أكلنا ولا بيشربوا من النيل وبيتحركوا من بره البلد".

يذكر أن أغنية "هما عاوزينها فوضى" قد حققت أكثر من مليون مشاهدة فى أقل من 24 ساعة من طرحها مساء أمس وقد عرضتها مجموعة من القنوات المصرية منها أكسترا نيوز وcbc، ويعد كليب "هما عايزنها فوضى" التعاون الرابع بين محمد رمضان والمخرج ياسر سامى بعد كليب أغنية "مافيا" و"القمر" والحفلة الأولى لمحمد رمضان التى أقيمت فى القاهرة بالتجمع الخامس.

محمد رمضان احتفل مؤخرًا بوصول قناته الرسمية على يوتيوب، إلى 2 مليار مشاهدة، وكان النجم محمد رمضان قد أحيا حفلا غنائيا فى الساحل الشمالى الجمعة الماضية، بحضور عدد من محبيه.