الهاي فايف يا جماعة! وما أدراك ما الهاي فايف

بص يا سيدي.....

 

المشهد الاول:

عارف فيلم ساندرا بولوك blind side؟ الست الشقرا اللي من تكساس بتتبنى الولد الأفريقى الضخم، وبيتحول من مشرد لأشهر لاعب كرة قدم امريكي؟ متعرفش الفيلم؟ مش مشكلة.. فى مشهد فى الفيلم هي بتقرا فيه ملف الولد الدراسي بتلاقي أنه فى الاختبار النفسي ليه وجدت أن لديه قدرة دفاعية بنسبة 92٪؜ وعلى الأساس دة طلبت من المدرب ينقله من الهجوم للدفاع.. وهنا كانت نقطة تحول حياته.

 

المشهد الثاني:

سنة تانية جامعة في الولايات المتحدة الأمريكية.. يطلب الدكتور/ المعلم شراء كتاب بـ20 دولارا لا لنقرأه، بل فقط لنأخذ كود من الكتاب (قبل ما يبقى مجاناً على الشبكة العنكبوتية بسنوات، والعشرين دولار مكانوش قليلين وقتها) من أجل ان نقوم باختبار قدرات يعرفنا ويعرف المعلم أقوى خمس نقاط في شخصية كل منا، و الهدف ملاءمة نقاط القوى مع التخصص المختار وكيفية توظيفها.. وعليها يا حسين..

 

من يومنا ذاك وأنا أعلم مفاتيحي، و كيفية التعامل معها.. وفكرت استنصح بعد 5 أعوام وأقوم بالاختبار مرة أخرى (يمكن تغيرت) وحياتك.. نفس الخمس نقاط.

 

حين تعلم يا عزيزي ان ( على سبيل المثال) 

 

- أحد نقاط قوتك  strategist، شخص لديه القدرة على التخطيط، و البناء.... من المنطقي ان تعمل في وظيفة تحتاج  لترتيب خطط و ووضعها قيد التنفيذ. 

- أو أنك brainstormer... من الأدعى أن تبحث عن عمل يحتاج إلى أفكار إبداعية في أى مجال كان.. 

- أو أنك single player... سيكون متعبا وغير منتج أن تعمل ضمن فريق، فذلك يعطل احد نقاط قوتك و يضعفها.

- أو أن تكون coach ستكون أنجح الأشخاص في مجالات التعليم و التحفيز.

 

والأمثلة عديدة، ورائع ما نكتشفه عن أنفسنا.... 

ولكن هذا جانب واحد، من جهة الفرد الشخصية.. فلننظر الى الجانب الآخر.. 

من الرائع ان تتمكن جهات التوظيف (الخاصة والعامة) من عمل هذا الاختبار للمتقدمين للوظائف لمعرفة كيفية توجيههم في الاماكن الملائمة، من مبدأ: الشخص المناسب، في المكان المناسب.

لكل مدير و رب عمل يحرك فريق من الاشخاص، هكذا اختبار سيساعده على اخراج احسن ما في فريقه و جعلهم يعملون في تناغم، اذ ان حين تحرك او توظف نقاط قوة شخص، فانت تشعل داخله طاقته الايجابية عن ذاته و احساسه بالقدرة على الانتاج و تقدير الذات.... ( حاجة حلوة اوي بصراحة)... مما يؤدي الى انتاج افضل و فلوس اكتر ليك يا افندم.

 

كل اللي فوق حلو اوي و جميلٌ تأثيره في الحياة العلمية و العملية... تخيل مدى حلاوة معرفة خبايانا البشرية على علاقتنا بذاتنا و بالأخرين!!! مقولكش...

 

تجربتي الشخصية: اوووف على كم الراحة حين عرفت (أخرى) أنا شخصية متعاطفة.. أعيش حالة محدثي كأني هو (علشان كدة مينفعش أدرس علم نفس وأمتهنه كمهنة.. مكنتش هاعرف أعالج.. أنا هاصدقهم وأعيش حالتهم كمان... كارثة).. كنت باسأل نفسي ازاي انا باستوعب طرفين في مشكلة واحدة و باصدق و باتعاطف مع الاتنين.. و اسأل روحي: انا منافقة؟ انا باكدب على حد فيهم؟ ابسلوتلي نوت.... انا شخصيتي بتستوعب فوق العادي موقف كل حد زي كأني هوا... و بافهم اسبابه و مبرراته عمل كدة ليه.... حلاوة الموضوع دة اني باعرف الاقي نقاط التقاء تجمع الطرفين تاني ( باحنن قلوبهم على بعض و اساعد عقولهم تستوعب بعض... وهنا بتهون كوارث و يتم التعامل معاها ببساطة و يسر).

انا believer: و كل اللي حواليا يشهدوا اني باعرف اطلع الحلو اللي جواهم ( انا بأؤمن بأن كل واحد فينا جواه الحلو اوي و الوحش اوي) و انا باعرف اطلع الحلو اوي دة، و باعرف اخليهم يشوفوه و يطلعوه و يصدقوه... و لما بيطلع ييتخضوا انه كان جواهم اصلاً... بس انا فيا حاجة بتبقى شايفاه من اول ما نتقابل..... و مكنتش فاهمة انا ازاي كدة لغاية اختبار ال high 5.

انا brain stormer: يا سلام على بوتيك الافكار اللي جوا...... اي موضوع، اي مجال، تلاقي العاب نارية بتنور كدة..... اربط اي حاجة في اي حاجة.... ممكن تبقى قدامك ... بس انا اعرف اخليها جديدة  و هي قدامك اصلاً.... و تبقى تحت بند الجديد...اه و الله... زي عناوين مقالاتي:

- في حياتي دولفين.

- رجلين ساقعة.

- احنا مش حلوين بزيادة، هما اللي وحشين بزيادة.

- لا تكن طائر عنقاء... خليك سفنجة.

- كلنا بصلة .....كلنا متروشكا.

 

مشهد النهاية: 

تخيل معايا كم التعديل اللي هتعمله في علاقاتك مع الاخرين بعد ما تعرف النقاط دي ( تسميهم الpower rangers, تسميهم المغامرون الخمسة... اللي تسميهم، علشان دول اللي صحابك بجد) انك تعرف تخلي الصحبة دي ضهر و سند و تعرف توظفها و تعيش صح... تعاملك مع اهلك هيتغير... مع صحابك، مع زمايلك... و الاهم مع شريكك... حلو اوي لو انتوا الاتنين عملتوه و اشتغلتوا على نقاط قوة بعض... 

 

الاختبار دة الهدف منه تتعرف على روحك، تقرا اللي مكتوب عنك و تقول: أنا عارف دة و مش عارفه برضه.. إنك توظف نفسك من اجل خدمة نفسك مستخدماً العلم المرة دي.. إنك تفهم اللي قدامك، انك متضغطش عليه... متطلبش حاجة خارج مناطق قوته... حلو اوي انك تعلي اللي قدامك و هو يعليك.... حلو اوي ان يكون لينا مساحة ننور.. واللي جنبنا ينور.

 

الاختبار:

https://high5test.com

 

شكراً

 

آخر الكلام:

أتمنى أن تحيا حياة تفخر بها، وإذا لم تنجح أتمنى أن تملك القوة لتبدأ من جديد.. "إريك روث"