أبو الروس: نيللى كريم رشحتنى فى "بـ 100 وش".. ومحمد يسرى: والدى مكنش راضى أمتهن التمثيل

قال الفنان حسن أبو الرووس، درست هندسة لأن والدى كان عاوزنى أكون مهندس وبقيت فعلا مهندس معمارى وطلعت الأول على دفعتى في الديكور، ودرست أيضا مزيكا ومسرح، وحتى زمان في المدرسة كنت بروح الفصل بحضر الافيهات الأول عشان أقولها للعيال لأن بحس إن عندى مسؤولية إنى لازم أضحكهم.

وعن مسلسل "بـ 100 وش"، له ظروف خاصة جدا وهى كنت معزوم على سحور، وكان معمول كاريوكى كتير وسماعات، فطلبوا منى أغنى ولما شفت نيللى كريم قلت هو أنا هاسيبها كده في حالها فروحت داخل عليها ووريتها كليب كنت عامله لمحمد صلاح لما اتصاب، وابتديت تتبسط منى وكده وقامت غنت معايا.

وتابعت، راحت نيللى كريم مرشحانى للمخرجة كاملة أبو ذكرى وعملتلى امتحان عشان عوزانى اضيف للكوميديا والحمد لله روحت واتمرنت على الورق لحد ما روحت وصورت.

فيما قال الفنان الشاب محمد يسرى، والدى الفنان إبراهيم يسرى مكنش راضى أدرس التمثيل وامتهنه وانه شغلانة مش ثابتة ومرهقة، وأتفقنا انى ادرس حاجة تانية وحصل كده فعلا وفى الاخر قلتله انا مش قادر ومش سعيد، ووقت ماقررت انى هامثل اتوفى بعدها بفترة بسيطة.

وأضاف، شاركت في الأول في فيلم "سيرة الحب" بعد كده روحت عملت فيلم انتاج سويدى المانى، وبسبب جالى مسلسل انجليزى وانتسبت لنقابة الممثلين في لندن.

وتابع، بدأت اشتغل هنا بقى لما رجعت مصر في "ليل خارجى"، و "أبواب الشك"، وحاليا عملت "حكاية بنات" الجزء الرابع والخامس"، وحاليا بعمل مع الفنان يحيى الفخرانى في مسلسل "نجيب زاهى ذركش"، ومعظم الوسط الفني اتخض إنى ابن إبراهيم يسرى لأنى عمرى ما قلت خالص