نبيل فاروق: "رجل المستحيل" اترفضت من كل دور النشر.. وفى حد راهنى أنها مش هتنجح

أكد الكاتب نبيل فاروق، رائد الأدب البوليسي، أن جاسوس سيناء أول قصة مخابراتية مرسومة بطلها طفل، وقال: "عرفت بفوزي على القصة دي بجائزة إبداع أكتوبر من الجورنال وعرفت بفوزي بجائزة الدولة التشجيعية من قناة النيل الثقافية، ولا حضرت حفلة ولا حضرت حاجة، وعاوز أقول حاجة أنا طول عمري يشتغل وخلاص ومش فارق معايا الجوائز والحفلات، الجائزة الأساسية هي حب الجمهور".

وأضاف خلال مداخلة مع الإعلامي عمرو خليل والإعلامية ريهام إبراهيم ببرنامج "من مصر" الذي يذاع على قناة cbc: "أنا هوياتي كتير أوي أوي، وعندي مكتب فيه كل اهتماماتي، والمكتب عندي أوضتين وريسيبشن، كلهم مكتبات، وعندي في روكسي مكتب فيه 4 مكتبات مليانين كتب، أنا مجنون قراية وتلاقيني عندي كم كتب مهول، ومبقتش أسلف حد الكتب، علشان في ناس كانت بتاخد الكتب ومبترجعهوش".

وقال: "بتقمص شخصية أبطال أعمالي وبتفاعل معهم جدا أثناء الكتابة، فكرة رجل المستحيل عملتها واترفضت من كل دور النشر، لأن معظمهم كان خايف من البطولة الفردية في الروايات، وفي ناس فيهم راهنوني أن القصة دي يستحيل تنجح في مصر".

وأضاف: "الراجل اللي راهنني أنها مش هتنجح قابلته في حفلة، وكتبلي شيك بألف جنيه لأن الرهان كان على ألف جنيه".