أحمد مالك يكشف لتليفزيون اليوم السابع كواليس اختياره لبطولة "حارس الذهب": فشلت كتير قبل ما أوصل

استمرارا لتغطية تليفزيون اليوم السابع، لكافة فعاليات مهرجان الجونة السينمائى فى الفترة من 23 لـ 31 أكتوبر الجارى، التقت كاميرا تليفزيون اليوم السابع، مع الزميلة شروق وجدى بالفنان أحمد مالك على هامش ندوة فيلمه المشارك في المهرجان.

وفى بداية حديثه لتليفزيون اليوم السابع قال مالك : " وصلت للعالمية بعد تجارب كتير إن في الآخر تعملى فيلم دولى الموضوع مش سهل وليه مراحل كتيرة جدا ، زى ما ذكرت من شوية مشاركتى في الأفلام المصرية وصلت لمهرجانات عالمية كانت هي البوابة الأولى آخرهم كان فيلم " ليل خارجى " اللى كان في تورونتو ، ولما رحت تورونتو اختارونى ضمن 4 مواهب عالمية وكنت العربى الوحيد ، وتم تقديمى في مهرجان تورنتو ومن هناك جالى وكيل اللى هو بيجيب أعمال وتجارب آداء وابتدى يتبعتلى تجارب كتيرة جدا لأفلام مختلفة وأفلام دولية ، وكنت بفشل كتير جدا لحد ما الحظ خبط معايا والمجهود بردو خبط معايا في هذا الفيلم الأسترالى واختارونى . "

وعن كواليس اختياره لبطولة الفيلم قال مالك: "تجارب الآداء عبارة عن انهم بيبعتولك مشهد أو اثنين وبيطلبوا منك انك تمثليهم فدايما بحتاج حد يساعدنى يقرأ معايا المشهد ويكون بيصور ، فأخويا بيساعدنى وممثلين زمايلى بيساعدونى زى عمرو عابد وعلى قاسم وكريم قاسم وسارة عبد الرحمن دايما بيساعدونى".