هنيدى: نجيب الريحانى أكتر شخص بيضحكنى.. وهذه نصيحتى لكتاب الكوميدى

قال النجم محمد هنيدى،" أكتر شخص بيضحكنى في الزمن الجميل الفنان الراحل نجيب الريحانى من خلال الـ 5 أفلام بتوعه، وفى كمان عظماء كتير مش عاوز أنسى حد، ولكن منهم فؤاد المهندس وعبد المنعم مدبولى وأمين الهنيدى، مرورا بالأستاذ عادل إمام وسعيد صالح وسيد زيان ومحمد نجم، إحنا عندنا كتير أوى أوى".

وأضاف هنيدى خلال لقائه في برنامج "كلمة أخيرة" تقديم الإعلامية لميس الحديدى، المذاع على قناة ON، أنا بنصح كل مؤلف شاب عاوز يكتب فيلم كوميدى لازم يشوف الخمس أفلام بتوع الفنان الراحل نجيب الريحانى، وأنا علطول بتفرج عليه في البيت وبتفرج على أفل أبيض وأسود كتير ومزهق العيال في البيت.

وعن علاء ولى الدين قال، أنا عمرى ما حسيت أنه غاب لأن في أي قعدة سيرته بتيجى والجمهور فاكره علطول وهو حالة جميلة قعدت معانا شوية ورحل ولكن فضل منه ذكريات وضحك وحاجات جميل، وانا لما بزور أخوه معتز وأدخل غرفته بفتكر كل حاجة.

وتابع، كمان الفنان الراحل خالد صالح، أنا اعرفه من زمان من قبلا علاء ولى الدين، وكنا طلبة ومجانين تمثيل، وكنا متأكدين أنه هيظهر وهايكون نجم مهما أتأخر ظهوره، وهو فعلا لم ييأس مرة أبدا وفضل مكمل لغاية لما ربنا كرمه وبقى نجم وبقى له رصيد كبير.

يذكر أن برنامج " كلمة أخيرة " تقديم الاعلامية لميس الحديدي   ويذاع  من السبت إلى الثلاثاء  في تمام التاسعه  على شاشة  " ON".