لميس الحديدى عن تطورات تحقيقات طفل المعادى: بيتكلم بسلطوية والطفل تربية أمه وأبوه

علقت الإعلامية لميس الحديدي، على تطورات التحقيقات فى حادثة طفل المعادي الذي قاد سيارة وصدم أحد أفراد الشرطة قائلة: "النيابة النهاردة حققت وعرفت التفاصي وأبو الولد طلع بايع العربية لحد من أصدقائه، ويبدو أن الولد عارف الشخص اللي اشترى العربية، وأنا مش عاوزة أقول "سرق" عاوزة أكون حريصة في الكلام هو أخد مفاتيح صاحب العربية من خلال ابنه، ونزلوا بقى في شوارع المعادي.

وأضافت الحديدي، عبر برنامجها "كلمة أخيرة" المذاع على شاشة "ON"، قائلة: "وظهر فيديو النهارده تاني النهاردة بيستهزئ بشرطي أخر بيقوله إنت واقف كده ليه بشكل فيه سطوة".

وأكملت قائلة: "قرار النيابة بضرورة تقويم الطفل ومش عاوزة أقول علاجه لأنهم اكتشفوا أنه مدلل جداً، حيث قامت بتسليمه لأهله وضرورة تقويمه، وأنا هنا عاوزة أتكلم عن السلوك مرة أخرى أمبارح أنا قلت على الولد إنه عيل ناقص رباية، والحقيقة أن هذه المشكلة يجب أن يدفع ثمنها والدا الطفل أباه وأمه لأنه مش عارف الفرق بين الكبير والصغير".

وتابعت: "حالة السلطوية اللي بيتكلم فيها في الفيديو واضح إنها موجودة في البيت أصلاً الولد سرق العربية أولاً ثم حديثه مع ضابط الشرطة بسلطوية "غير معهودة" وأنا أظن أن الاب والأم محتاجين يقفوا مع أنفسهم وقفة قبل أن يلموا الطفل ويسالوه جاب العربية إزاي والتطورات اللي بعدها.. لابد من وقفة مع الاهل لأن الولد لو لم يقوم سلوكه هيكبر وهيبقى أسوأ من كده، ده إنتوا هتشتوفوا البدع شكل تاني.. إحنا عاوزين نربي جيل مايخفش من منفذي القانون ويحترموا إنفاذ القانون، أنا مش عاوزة طفل يخاف من الشرطة عاوزة ولد يحترم إنفاذ القانون، بيعلموا كده بره بيعلموا الطفل احترام القانون والشرطة ".

واستطردت: "أنا اسفة السلوك ده متعلمه في البيت ما هو العيل ده تربية بيته أبوه وأمه، وده سلوك متاخد من البيت هو الأب بيتعامل كده ليه؟ هو بيعامل البيت والناس اللي حواليه كده، وماتكلمونيش عن طفل مدلل ولا مش مدلل هذا كلام لا يستقيم مع القانون".