حسن يوسف يطمئن جمهوره بعد أنباء مرضه: لسه واكل بتنجان مخلل.. الفنان الكبير لـ"تليفزيون اليوم السابع": بتوع الشائعات موتوا كل الوسط وقلبوا دماغنا.. و"جسم" ماجد الكدوانى يساعده على تجسيد دور البابا شنودة

رد الفنان حسن يوسف، على الشائعة التى رددها البعض حول مرضه قائلا: أنا الحمد لله زى الفل، وأضاف فى حوار اختص به "تليفزيون اليوم السابع"، لما بسمع أى شائعات زى دى بضحك لأن مفيش حد من الوسط الفنى غير لما موته أو قالوا إنه مريض بتوع الشائعات موتوا كل بتوع الوسط الفنى.

وتابع : أنا حاسس إنه الكلام عن مرض الفنانين "شيء ممنهج " ومش أمر عشوائى مفيش حد فاضى قاعد على التليفونات كل يوم يموت واحد.

واستطرد: من 30 سنة اتصل بيا شخص وقالى هنخطف بنتك إللى فى الحضانة ولا تدفع 5 آلاف جنيه، وقالولى قابلنا فى إسكندرية عند كازينو معين، متابعاً : من وقتها خوفت على بنتى وبقيت أوديها المدرسة وأجيبها بنفسى أنا وشمس البارودى وطلبت بنتنا تركب الأتوبيس مع أصحابها بقينا نمشى ورا الأتوبيس أنا ومراتى بالعربية خوفاً عليها.

وقال: روحت لوزير الداخلية وقتها وقالى أن فيه ناس كتير جالها نفس التهديد وبعدها اطمنت.

كما علق على الشائعات التى رددها البعض حول مرضه وتعرضه لوعكة صحية شديدة قائلاً : إللى بيطلع الشائعات دى ناس سخيفة إشمعنى الممثلين إللى بتطلعوا عليهم شائعات، المسـألة فيها حاجة نفسية.

وتابع : دول بيتبادلوا الأدوار، بيقولوا بقالنا 3 أسابيع مموتناش فلان تعالى نموته النهارده بشائعة وهكذا.

وقال الفنان حسن يوسف : بقابل الشائعات عنى بالضحك، لكن أسرتى بتزعل وبتتخض عليا وخاصة أن أولادى مسافرين برة وصحابى وبيتصلوا يطمنوا ويخافوا علينا ودا إللى بيضايقني.

فى سياق متصل قال : السوشيال ميديا جايبة لينا قالبة الدماغ.

وقال إنه كان يتبع نظاماً يومياً غيره ظهور فيروس كورونا، متابعاً : كورونا لخبطت حياتى وطول الوقت قاعد فى البيت أتفرج على أفلام أكشن أو أتابع أخبار.

قال الفنان حسن يوسف، إنه مشغول للغاية بأخبار محمد صلاح متابعاً راجل كان فى لندن ومجالوش حاجة يجى هنا 24 ساعة يصاب بكورونا.

وأضاف فى تصريحات خاصة لـ"تليفزيون اليوم السابع"، ربنا يشفيه يا رب محمد صلاح رافع راسنا، وفخر مصر.

وحول تجسيده لدور البابا شنودة قال : أحد "الخبثاء" سألنى عن تمثيل دور البابا شنودة وقالى إنت عملت الإمام الشعراوى والإمام ابن ماجة ولو اتعرض عليك البابا شنودة تعمله؟، مضيفاً أنا طبعاً فكرت فى الرد وقولتله أن البابا شنودة أجمع جميع المصريين على حبه أقباط ومصريين، وعمل زى دا محتاج تدخل الكنيسة ممثل أجنبى ومخرج أجنبي.

وتابع ماجد الكدوانى أفضل من يؤدى دور البابا شنودة لان شكله الجسمانى يؤصل الشخصية.

ووجه الفنان حسن يوسف، رسالة طمأنينة لجمهوره رداً على الشائعات التى تردد حول سوء حالته الصحية قائلاً أنا كويس باكل طعمية وبتنجان مخلل.

وأكد أن بصحة جيدة، وان كل ما يتردد عن تعرضه لوعكة صحية غير صحيح على الإطلاق.

وكشف حسن يوسف أنه يتاع جيداً الوسط الفنى والأعمال الفنية التى يقوم بها النجوم فى الفترة الحالية نظراً لطول فترات جلوسه بالمنزل.