سميحة أيوب تهاجم مسرحيات الضحك فى لقاء خاص لـ"تليفزيون اليوم السابع": فاهمين الموضوع غلط وعيب اللى بيتعمل ده.. أزمة المسرح تنتهى برواية بتحترم عقلية المشاهد مش بتضحكه على الفاضى.. وتتجنب التعليق على مسرح مصر

وسط إجراءات احترازية مشددة والتزام بارتداء الكمامات والتباعد الجسدى انطلقت فعاليات الدورة الخامسة من مهرجان شرم الشيخ الدولى للمسرح الشبابى. تليفزيون اليوم السابع كان له لقاء مع الفنانة الكبيرة سميحة أيوب عن المسرح وماضيه ومستقبله أجرته الزميلة رغدة بكر.

وعن وجود جوائز باسمها، قالت سميحة أيوب لـ "تليفزيون اليوم السابع": "التكريم يعنى الكثير أنك تعلمى أجيال جديدة بأدوات جديدة بتواصل الثقافات، علشان نعرف المسرح المصرى موجود فين فى الخريطة".

وخلال لقائها لـ"تليفزيون اليوم السابع" على هامش فعاليات مهرجان شرم الشيخ الدولى للمسرح الشبابى، علقت سميحة أيوب على أزمة المسرح قائلة: "أزمة المسرح مفتعلة.. بعض الفنانين فاهمين المسرح غلط، وفاهمين إن الجمهور عايز كدة، لكن الجمهور مش عاوز كدة.. الجمهور بيدخل المسرحية لإن دى الوجبة الوحيدة اللى بيلاقيها فبيضطر يشوفها.. إنتى وانتى جعانة بتاكلى أى حاجة لكن لما بتلاقى قصادك سفرة بتنتقى.. لما يكون فى أعمال جميلة حلوة الجمهور هينتقى.. لما بتطلع رواية كويسة بتبقى مكتملة الحضور.. رواية بتحترم عقلية المشاهد مش بتقعد تخليه يقتل وقته ويضحك على الفاضى ويخرج مش عارف هو شاف إيه بس قاعد يضحك.. مش دى الرسالة بتاعة المسرح.. رسالة المسرح تنويرية".

وأضافت الفنانة الكبيرة: "أزمة المسرح أزمة مفتعلة وأزمة استسهال لكن المسار دلوقتى بيتعدل إن شاء الله.. أنا شايفة كذا مسرحية ليها القوام بتاعها.. فى النهاية عيب اللى بيتعمل.. عيب اللى بيتعمل فى مصر". وتابعت: "الفن تنوير.. الفن رسالة ثقافية تنويرية اجتماعية حضارية سياسية".

وعن المقارنة بين الستينيات والآن فى المسرح، قالت: "ياريت نرجع للستينيات.. ياريت نرجع للعظمة بتاعة الستينيات.. ونعمل المسرحيات اللى فيها جهد كبير"، وعند سؤالها عن مسرح مصر وتقييمها لما يقدمه تجنبت الفنانة الكبيرة التعليق قائلة: "فى مسرحيات السنة دى متحضرلها كويس إن شاء الله".

ووجهت سميحة أيوب رسالة لمحبيها عبر تليفزيون اليوم السابع، قائلة: "كل سنة وانتوا طيبين.. وإن شاء الله السنة الجاية يكون العالم نضف من كورونا ونرجع لحياتنا الطبيعية".

ووسط إجراءات احترازية مشددة والتزام بارتداء الكمامات والتباعد الجسدى انطلقت فعاليات الدورة الخامسة من مهرجان شرم الشيخ الدولى للمسرح الشبابى، بحضور اللواء خالد فودة محافظ جنوب سيناء، والدكتور أشرف زكى رئيس أكاديمية الفنون، والفنانة سميحة أيوب الرئيس الشرفى للمهرجان، والدكتور أحمد عواض رئيس الهيئة العامة لقصور الثقافة، والفنان مازن الغرباوى رئيس المهرجان، وعدد من قيادات وزارة الثقافة ونجوم المسرح المصرى.