حنان مطاوع تتحدث عن ذكرياتها مع والدها فى لقاء خاص لتليفزيون اليوم السابع

تحدثت الفنانة حنان مطاوع عن أدوارها في الفترة الأخيرة، وقصة مطالبات الجمهور بأن تصبح حنان مطاوع هي البطل، قائلة: "أنا مبشوفش إن في حاجة بتتأخر.. دى حاجة بتاعة ربنا.. عليا إنى أسعى وأطور من نفسى وأستمتع وأحاول طول الوقت أكون فى مكانة أفضل فنيّا، والترتيب والبزوغ ده بتاع ربنا".

وقالت حنان مطاوع، فى حوار خاص لتليفزيون اليوم السابع على هامش مهرجان شرم الشيخ، عن علاقتها بوالدتها: "بابا كان أذكى كائن حى في الحياة بالنسبالى.. ماما كانت طول الوقت عندها طموح ليا.. لكن بابا كان شايف ميولى وكان شايف طاقتى وكان عايزنى أكون نفسى وكان قارينى.. وأنا في ثانوي دخلت علمى.. فهو قالى إنى ميولى كلها أدبية.. لكن أنا دخلت علمى وفي أول شهر استصعبت الموضوع وحولت أدبى فقالى تمام تصحيح مسار.. وقررت أدخل تجارة إنجليزى.. وهو كان رافض وبيقولى إنى هسقط.. وانتى مبتحبيش الفشل.. وقالى انتى هتلفى تلفى وتشتغلى يا ممثلة يا مخرجة.. أنا كنت بتمرد على بابا دايما.. وكنت رافضة إنى أدخل مجال الفن علشان ميقولوش إنه فرضنى".

وأضافت حنان مطاوع وهى تغالب دموعها: "بابا كان شايف ميولى.. كان شايف طاقتى وكان عايزينى أكون نفسى". وتابعت: "أنا فاكرة وصيته قبل ما يموت وأنا في أولى كلية، والأستاذ سعد أردش والأستاذ جلال الشرقاوى أطال الله في عمره قالهم البنت دى شيلوها من البتاع اللى دخلته ده ودخلوها معهد فنون مسرحية، دى مش هتفلح غير مخرجة أو ممثلة.. بس أنا كملت ونجحت في تجارة إنجلش.. وبعدين دخلت برضه مجال الفن".

وعن العلاقة بين كرم مطاوع وسهير المرشدى، قالت: "أنا كنت أصغر من إنى أقيّم العلاقة لأنها خلصت بالنسبالى في سن مبكر أوى.. بس أقدر أقولك بالنسبالى أنا.. هما الاثنين ادونى كتير وليهم فضل عليا في كل حاجة ولو فيا حاجة كويسة هتبقى بسبب ماما وبابا.. بس ماما كانت معبرة أكتر عن مشاعرها.. فكانت بتدينى مشاعر معلنة أكتر.. صحبتى.. نتخانق.. أحكيلها حاجة حصلت بينى أنا وصحابى.. فهى كانت صحبتى.. بابا كان طول الوقت تقيل في نفسه خجول وشخصية جوه نفسه.. بيحب أوى ويكتم.. بيبقى عايز يضحك وبيكتم.. وأنا واخدة شخصيته.. واخده من بابا أكتر الشخصية".

وعن ابنتها قالت: "خدت منى نشفان الدماغ وواخده البشاشة..  ربنا يباركلى فيها.. بتحب الناس رغم إننا في زمن كورونا حيث العزلة.. بتقابل الناس كلها بابتسامة.. وواخدة العند منى والشقاوة من باباها". وفى نهاية اللقاء قدمت حنان مطاوع أغنية "السكر غلى وأنا أحلّى بإيه" لولدتها سهير المرشدى.