سارة طرزت ملابسها بالمعاكسات الخادشة للحياء.. صدمة لمحاربة التحرش اللفظى

ملابس سارة أيمن

كتبت- نورا طارق

السبت، 21 نوفمبر 2020 12:00 م

من بعيد ترى "جيبة وبلوزة" واسعتين، بألوان محايدة غير لافتة للأنظار وحين تقترب منها تنتابك الصدمة من الألفاظ الخادشة للحياء التى طرزت عليها فى أماكن متفرقة عشوائية، كانت هذه الصدمة هى طريقة "سارة أيمن" خريجة الفنون التطبيقية فى مواجهة المجتمع بالصدمة التي تنتاب الفتيات اللائى يتعرضن للتحرش اللفظى بهذه العبارات الخارجة بشكل شبه يومى، وكان عملها الفنى الجرىء مثار الكثير من الجدل على السوشيال ميديا.

الملابس داخل المعرض

الملابس داخل المعرض

اختارت سارة أن تنفذ عملها الفنى بقطع من ملابسها سبق وكانت شاهدة على تعرضها للتحرش اللفظى والمضايقات فى الشارع، وتحدثت عن عملها الفنى الجديد، والمعروض بأحد المعارض الفنية بوسط البلد لـ"اليوم السابع": "أنا زى أى بنت بتتعرض للتحرش اللفظى بشكل يومى، فكرت أعبر عن ده بكتابة الألفاظ اللى بسمعها على هدومى، عشان أعرف الناس مدى بشاعة الألفاظ اللى بنسمعها يومياً، والحقيقة أنا كنت فاكرة إن دى أبشع حاجة لكن اكتشفت من خلال استبيان عملته على صفحتى على "إنستجرام"، إن فيه ألفاظ أبشع من كده البنات بتسمعها".

بلوزة سارة

استخدمت سارة، الألفاظ الخادشة للحياء التى تتردد على مسامعها أثناء سيرها بالشارع، ودونتها على ملابسها، ونشرت صور عملها الفنى الجديد على صفحتها الخاصة بموقع "فيس بوك"، ولاقت ردود أفعال متباينة من الجنسين، حيث قالت "رد فعل الناس كان فيه اختلاف فى وجهات النظر، يعنى فيه بنات كتير، شكرتنى إنى عبرت عنهم، وبنات اتشجعت وكتبت عن مواقف اتعرضت لها، وبنات قدمت بلاغات للمباحث الإلكترونية، لكن اتعرضت لنقد سلبى من الرجالة منهم اللى شتم ومنهم اللى شاف إن ده مش عمل فنى، وناس شافت إن ماينفعش أكتب ألفاظ خارجة، رغم إن دى الألفاظ اللى إحنا بنسمعها بشكل يومى".

داخل المعرض

وتابعت "أنا استخدمت الألفاظ الخارجة اللى بيقولها المتحرش، عشان الناس تعرف البنت بتتعرض لإيه وتبدأ تتفاعل مع القضية ويوجهون غضبهم للمتحرش، لكن للأسف ناس كتير وجهت غضبها ليا أنا، إن إزاى بنت تكتب كده وتعبر بالجرأة دى".

سارة أيمن

وعن تأثير العمل على مكافحة قضية التحرش اللفظى، قالت سارة: "أنا عارفة إن عملى الفنى الأخير، مش هيقضى على ظاهرة التحرش اللفظى، لكن ممكن يحقق هدفه، وهو تعريف الناس بالألفاظ الخادشة للحياء اللى البنت بتسمعها، لكن لازم الكل يتحرك ويتكلم عن القضية سواء فى مواقع التواصل الاجتماعى المختلفة أو الأعمال الدرامية".

ملابس سارة