لميس الحديدى توجه رسالة لمشجعى النادى الأهلى بعد أزمة شيكابالا

علقت الإعلامية لميس الحديدى، على أزمة التعصب الكروي وما تعرض له محمود عبد الرازق شيكابالا، نجم الفريق الأول لكرة القدم بنادي الزمالك من تنمر، قائلة: "ظاهرة التعصب الكروى لابد أن نقف أمامها وهو أمر مزعج جدًا ونقول ماينفعش.. وأنا بوجه كلامي لبعض جمهور الأهلى لأني عارفة أن جمهور الأهلى جمهور محترم، خاصة في وقت فرحته، أنه لا ينصب له حفرة".

وأضافت عبر برنامجها "كلمة أخيرة"، المذاع على شاشة ON: "من لايدرك أنه يراد أن يُدفع به لدائرة العنصرية والتعصب، مش واخدين بالكم إن دى غلوشة، حد بيحاول يخليكم تغلوشوا على فكرة النصر والكأس وتروحوا لحتة تانية خالص، ويبقى الحديث كله مش على فرحة الأهلى بكأس أفريقيا ويبقى اهتمامنا كله شيكابالا عمل إيه وبعض جمهور الأهلى عمل إيه".

 وتابعت: "شيكابالا لاعب متميز جداً وأحرز هدفا مهما وعيب نشتم الناس بأصلها وشكلها ولونها.. إحنا ما نعملش كده كمصريين وكبني آدمين وكأهلاوية، بالذات لما تكون منتصر لأن المنتصر دائماً عنده شيمة الكرم وأنا عملت كده مع مرتضى منصور ومارضتش أدخل فى الهجوم  في أوقات الضعف، وفي قصة شيكابالا حاسة إن فيها اافتعال وفيه جر لدائرة الشر.. وأنا دائما ضد نظرية المؤامرة لكن بدأت أشك إن فيه مؤامرة؟ وإنتوا عارفين المؤامرة جاية منين؟".

ووجهت رسالة لشيكابالا قائلة: "أنت كلاعب لازم تكون منضبط بلاش استثارة الجماهير، ومش ببرر اللى عملته الجماهير بالعكس غلط ولازم يعاقبوا، وفيديوهات الإساءة عيب أوى، ليه بتخلى حد  يجرك للناحية التانية لازم كجمهور تترفعوا وتقفوا خلف فريقكم لا تشتموا ولا تغلطوا وإنتوا كسبانيين أو خسرانين".